VHT 2022: విజయ్‌ హజారే ట్రోఫీలో కోహ్లీ రికార్డుని సమం చేసిన నారాయణ్‌ జగదీశన్‌

ఇంటర్నెట్ డెస్క్: విజయ్ హజారేలో ట్రోఫీలో ఒకే సీజన్‌లో అత్యధిక సెంచరీలు (4) చేసిన విరాట్ కోహ్లీ రికార్డును తమిళనాడు ఆటగాడు జగదీశన్‌  నారాయణ్‌ సమం చేశాడు. శుక్రవారం హరియాణాతో జరిగిన మ్యాచ్‌లో జగదీశన్‌ (128; 123 బంతుల్లో  6 ఫోర్లు, 6 సిక్స్‌లు) సెంచరీ బాదాడు. 2008-09 సీజన్‌లో విరాట్‌ కోహ్లీ నాలుగు సెంచరీలు (102, 119*,124, 114) బాది మొత్తం 534 పరుగులతో టాప్ స్కోరర్‌గా నిలిచాడు. విజయ్‌ హజారే ట్రోఫీలో ఒకే సీజన్‌లో అత్యధిక సెంచరీలు చేసిన ఆటగాళ్ల జాబితాలో విరాట్ కోహ్లీ, నారాయణ్‌ జగదీశన్‌తోపాటు రుతురాజ్ గైక్వాడ్, పృథ్వీ షా, దేవదత్ పడిక్కల్ ఉన్నారు.  

ఈ మ్యాచ్‌లో నారాయణ్‌ జగదీశన్‌ మరో రికార్డును కూడా అందుకున్నాడు. లిస్ట్-ఏ క్రికెట్‌లో కుమార సంగక్కర, అల్విరో పీటర్సన్‌, పడిక్కల్‌ తర్వాత నాలుగు సెంచరీలు బాదిన ఆటగాడిగా నిలిచాడు. జగదీశన్‌ ఇప్పటివరకు 41 లిస్ట్‌ -ఏ మ్యాచ్‌లు ఆడి 44.55 సగటుతో 1782 పరుగులు చేశాడు. ఇందులో ఏడు సెంచరీలు, 6 అర్ధ సెంచరీలున్నాయి. ఇక,  మ్యాచ్‌ విషయానికొస్తే.. నారాయణ్‌ జగదీశన్‌ శతకం బాదడంతో తొలుత బ్యాటింగ్‌ చేసిన తమిళనాడు నిర్ణీత 50 ఓవర్లలో 7 వికెట్లు కోల్పోయి 284 పరుగులు చేసింది. ఈ లక్ష్య ఛేదనలో హరియాణా 28.3 ఓవర్లలో 133 పరుగుకే ఆలౌటైంది. దీంతో తమిళనాడు 151 పరుగుల ఘన విజయం సాధించింది.