Virat Kohli : ఇది విరాట్‌ నామ సంవత్సరం.. కోహ్లీ ఆల్‌ టైమ్‌ గ్రేట్‌ అంటూ ప్రశంసలు

ఇంటర్నెట్‌ డెస్క్‌ : ‘అన్న అడుగేస్తే మాస్‌.. అన్న లుక్కేస్తే మాస్‌..’ ఈ మాస్‌ బీట్‌ను ఇప్పుడు క్లాస్‌ ప్లేయర్‌ కింగ్‌ కోహ్లీ(Virat Kohli)కి అన్వయించుకోవాలేమో. ఎందుకంటే విరాట్‌ అడుగేస్తే సెంచరీ.. లుక్కేస్తే శతకం అన్నట్లుగా ఈ కొత్త ఏడాదిని ఘనంగా ప్రారంభించి తన శతకాల దాహం తీర్చుకుంటున్నాడు. ఈ ఏడాదిలో ఇప్పటి వరకూ ఆడింది మూడు వన్డేలే.. అందులో రెండు గొప్ప శతకాలతో ఆకాశమే హద్దుగా చెలరేగాడు. ఇక కోహ్లీ వన్డేల్లో ఆడిన గత నాలుగు ఇన్నింగ్స్‌లను తీసుకుంటే.. ఇది అతడికి మూడో సెంచరీ. ఈ క్రమంలో గాడ్‌ ఆఫ్‌ క్రికెట్‌ సచిన్‌ రికార్డులే లక్ష్యంగా ఎవరికీ అందనంత ఎత్తులో దూసుకుపోతున్నాడు. ఇది విరాట్‌ (Virat Kohli) నామ సంవత్సరమే అన్నట్లుగా రికార్డులను లిఖిస్తున్నాడు.

శ్రీలంకతో జరిగిన చివరి వన్డే(IND Vs SL)లో ఈ పరుగుల యంత్రం (166*: 110  బంతుల్లో 13 ఫోర్లు, 8 సిక్స్‌లు) తన వన్డే కెరీర్‌లో రెండో అత్యుత్తమ గణాంకాలు నమోదు చేశాడు. దీంతో కోహ్లీ ప్రదర్శనపై సోషల్‌ మీడియాలో ప్రశంసల వర్షం కురుస్తోంది. విరాట్‌ది అద్భుత ఇన్నింగ్స్‌ అంటూ కొనియాడుతున్నారు.

* వైట్‌బాల్‌ క్రికెట్‌లో విరాట్‌ అత్యుత్తమ ప్రదర్శనతో తిరిగిరావడం అద్భుతం. అజేయమైన 166 పరుగులు అతడి అత్యుత్తమమైన ప్రమాణాలకు ఎంతో ప్రత్యేకం - వీవీఎస్‌ లక్ష్మణ్‌.

* ‘క్రికెట్‌లో గ్రేట్‌ ఆఫ్‌ ఆల్‌ టైమ్‌(GOAT) కోహ్లీయే. ఫుట్‌బాల్‌లో దిగ్గజ ఆటగాడు లియోనెల్‌ మెస్సి ఎలాగో.. అంతర్జాతీయ క్రికెట్‌లో విరాట్‌ కూడా GOAT. 2023 కోసం కోహ్లీ స్క్రిప్ట్‌ చక్కగా రాసుకున్నాడు’ -శ్రీలంక మాజీ ఆటగాడు ఫర్వీజ్‌ మహరూఫ్‌

* ‘కోహ్లీ గత నాలుగు వన్డే ఇన్నింగ్స్‌ల్లో మూడు సెంచరీలు బాదడం నాకు ఆశ్చర్యం అనిపించలేదు. విరాట్‌ ఒక్కసారి ఫామ్‌లోకి వచ్చాడంటే.. దాన్ని కొన్నేళ్లపాటు కొనసాగిస్తాడు’- భారత మాజీ ఆటగాడు వసీం జాఫర్‌

* పాక్‌లోని అభిమానులు కూడా కోహ్లీని ఆకాశానికెత్తుతున్నారు. వన్డే ఫార్మాట్‌లో బాబర్‌ అజామ్‌.. కోహ్లీకి ఏ మాత్రం సరిపోడని వ్యాఖ్యానిస్తున్నారు.