Virat Kohli: బెంగళూరు అభిమానులకు విరాట్ కోహ్లీ స్పెషల్ మెసేజ్‌

ఇంటర్నెట్ డెస్క్: టీ20 లీగ్‌లో ఏటా ‘ఈ సాలా కప్‌ నమదే’ అంటూ వచ్చే బెంగళూరును ఈ సారి కూడా దురదృష్టం వెంటాడింది. శుక్రవారం జరిగిన క్వాలిఫయర్‌-2లో బెంగళూరుపై రాజస్థాన్‌ 7 వికెట్ల తేడాతో విజయం సాధించింది. దీంతో టైటిల్‌ కల నెరవేరకుండానే బెంగళూరు టోర్నీ నుంచి నిష్క్రమించింది. ఈ పరిణామంతో ఇటు బెంగళూరు, అటు విరాట్ అభిమానులు తీవ్ర నిరాశకు గురయ్యారు. కొంతమంది అభిమానులు భావోద్వేగాన్ని అదుపు చేసుకోలేక కన్నీరు కూడా పెట్టుకున్నారు.

ఈ నేపథ్యంలో బెంగళూరు జట్టుపై చూపుతున్న ప్రేమాభిమానాలను దృష్టిలో ఉంచుకుని ట్విటర్‌ వేదికగా అభిమానులను ఉద్దేశించి విరాట్‌ కోహ్లీ ఓ స్పెషల్‌ మెసేజ్‌ చేశాడు. ‘కొన్నిసార్లు మీరు (అభిమానులు) గెలుస్తారు, కొన్నిసార్లు మీరు గెలవలేరు. ఈ సీజన్‌ అంతా మాకు మద్దతుగా నిలిచారు. దీంతో ఆటను ప్రత్యేకంగా ఉండేలా చేశారు. నేర్చుకోవడం ఎప్పుడూ ఆగదు. ఈ అద్భుతమైన ఫ్రాంచైజీలో భాగమైన యాజమాన్యానికి, సహాయక సిబ్బందికి, అభిమానులకు కృతజ్ఞతలు. మళ్లీ వచ్చే సీజన్‌లో కలుద్దాం’ అని విరాట్ కోహ్లీ ట్వీట్‌ చేశాడు. ఈ సీజన్‌లో కోహ్లీ బ్యాటర్‌గా నిరాశపరిచాడు. 16 మ్యాచ్‌లు ఆడి 22.73 సగటుతో 341 పరుగులు మాత్రమే చేశాడు. ఇదిలా ఉండగా, ఆదివారం అహ్మదాబాద్ వేదికగా జరిగే టీ20 లీగ్‌ ఫైనల్‌లో గుజరాత్, రాజస్థాన్‌ జట్లు తలపడనున్నాయి.