Virat kohli: ఆ ఫ్రైడ్‌ రైస్‌ రుచిని ఎప్పటికీ మర్చిపోలేను: విరాట్

దిల్లీ: టీమ్‌ఇండియా క్రికెటర్‌ విరాట్‌ కోహ్లీ(Virat kohli) ఫిట్‌నెస్‌కు పెట్టింది పేరు. తాను కోరుకున్న ఆకృతి కోసం కఠినమైన డైట్‌ ఫాలో అవ్వడం, కసరత్తులు చేయడంలో ఈ ఆటగాడు ఏమాత్రం రాజీపడడు. అయితే, ఇటీవల ఓ కార్యక్రమంలో పాల్గొన్న కోహ్లీ తన చిన్ననాటి విషయాలను పంచుకున్నాడు. ఇప్పుడంటే ఆహార నియమాలు  ఉన్నాయి గానీ చిన్నప్పుడు రోడ్డు పక్కన అమ్మే తినుబండారాలను ఇష్టంగా తినేవాడినని తెలిపాడు. చైనీస్‌(Chinese food) వంటకాల గురించి మాట్లాడుతూ తాను తిన్న ఓ వంటకం రుచిని ఎప్పటికీ మర్చిపోలేనన్నాడు. 

‘‘ఓసారి మేం ఒక చైనీస్‌ రెస్టారెంట్‌కు వెళ్లాం. అక్కడున్న వాన్‌ పేరు ‘చుక్‌ చుక్‌ మెయిల్‌’. వారు చేసిచ్చిన మాంచో సూప్‌, ఫ్రైడ్‌ రైస్‌ని నేనెప్పటికీ మరచిపోలేను. ఆ చైనీస్‌ వంటకం రుచి మరెక్కడా దొరక్కపోవచ్చు’’ అంటూ వివరించాడు.  ప్రముఖ చెఫ్‌ వికాస్‌ ఖన్నా(Vikas khanna)ను తన సొంత రెస్టారెంట్‌ ‘వన్‌8 కమ్యూన్‌’కు కోహ్లీ ఆహ్వానించాడు. ఈ సందర్భంగా ఇద్దరూ కాసేపు సరదాగా ముచ్చటించారు. ఈ  వీడియోను విరాట్‌ తన ఇన్‌స్టాగ్రామ్‌లో పంచుకున్నాడు.