Wasim akram: ఇంత గొప్ప ఆటగాడిపై ట్రోలింగ్‌ చేశారు: వసీం ఆక్రమ్‌

దిల్లీ: ఆసియాకప్‌లో భాగంగా పాకిస్థాన్‌తో జరిగిన మ్యాచ్‌లో విలువైన క్యాచ్‌ను వదిలేసిన అర్ష్‌దీప్‌ సింగ్‌ నెటిజన్ల ఆగ్రహానికి గురైన విషయం తెలిసిందే. ఆ సమయంలో జట్టు అతడికి మద్దతుగా నిలిచింది. ప్రస్తుతం జరుగుతున్న టీ20 ప్రపంచకప్‌లో మాత్రం ఈ లెఫ్ట్‌ హ్యాండర్‌ పేసర్‌ ఆకట్టుకుంటున్నాడు. ఈ నేపథ్యంలో పాక్‌ మాజీ దిగ్గజం వసీం అక్రమ్‌ ఈ యువ ఆటగాడిపై ప్రశంసలు కురిపించాడు. 

‘‘అతడి ప్రతిభను నేను, వకార్‌ యూనిస్‌ ఆసియా కప్‌ సమయంలోనే గుర్తించాం. సూపర్‌ 12 దశలో ఇప్పటివరకు ఎవ్వరూ చేయని విధంగా అర్ష్‌దీప్‌ ఈ టోర్నమెంట్‌లో మొత్తం 9 వికెట్లు పడగొట్టాడు. కొత్తబంతితో అతడు రెండు వైపులా స్వింగ్‌ చేయగలడు. భారత టీ20 లీగ్‌లోనూ గొప్పగా ఆడాడని అంతా చెప్తున్నారు. ఈ యువ బౌలర్‌కు మంచి భవిష్యత్తు ఉంది. అతడెంతో తెలివైనవాడు. బంగ్లాతో మ్యాచ్‌లో అతడు వేసిన యార్కర్లు ఆట గమనాన్ని మలుపుతిప్పాయి. భారత్‌లో ఈ ఆటగాడిపై సామాజిక మాధ్యమాల్లో ట్రోలింగ్‌ చేశారు. కానీ అతడు ఇవేవీ పట్టించుకోలేదు. ఆటగాడికి కచ్చితంగా ఉండాల్సిన లక్షణం ఇది’’ అంటూ వసీం తెలిపాడు. బుమ్రా లోటును భర్తీ చేస్తూ జట్టులోకి అడుగుపెట్టిన ఈ ఫాస్ట్‌ బౌలర్‌ ప్రపంచ జట్టులో కీలక ఆటగాడిగా రాణిస్తున్నాడు. ఆస్ట్రేలియా హార్డ్‌, బౌన్సీ పిచ్‌లపై ముందుగానే ప్రాక్టీస్‌ చేసి సన్నద్ధంగా ఉండటం వల్లే మంచి ఫలితాలు రాబడుతున్నట్టుగా ఈ హర్ష్‌దీప్‌ పేర్కొన్నాడు.