రబాడా సాధించేది తల్చుకుంటే భయమేస్తుంది

ఇంటర్నెట్‌డెస్క్‌: దక్షిణాఫ్రికా పేస్‌బౌలర్‌ రబాడ టెస్టుల్లో 200 వికెట్లు సాధించడంపై టీమ్‌ఇండియా మాజీ బ్యాట్స్‌మన్‌ వసీం జాఫర్‌ ప్రశంసలు కురిపించాడు. దక్షిణాఫ్రికా ప్రస్తుతం పాకిస్థాన్‌ పర్యటనలో ఉన్న సంగతి తెలిసిందే. ఈ నేపథ్యంలో కరాచిలో జరుగుతున్న తొలి టెస్టులో పాక్‌ తొలి ఇన్నింగ్స్‌ సందర్భంగా రబాడ 3 వికెట్లు తీశాడు. ఈ మ్యాచ్‌కు ముందు అతడు 197 వికెట్లతో కొనసాగుతుండడంతో ఇప్పుడు 200  మైలురాయి చేరుకున్నాడు. దీంతో దక్షిణాఫ్రికా తరఫున ఈ ఘనత సాధించిన ఎనిమిదో ఆటగాడిగా నిలిచాడు. అలాగే ఈ ఫార్మాట్‌లో 200 వికెట్లు తీసిన వారిలో రబాడా (40.8) అత్యుత్తమ స్ట్రైక్‌రేట్‌ కలిగిన బౌలర్‌గానూ రికార్డు నెలకొల్పాడు.

ఈ విశేషాన్ని తెలియజేస్తూ ఓ క్రీడా సంస్థ పోస్టు చేసిన ట్వీట్‌కు జాఫర్‌ స్పందించాడు. ‘టెస్టుల్లో 200 వికెట్లు తీసిన రబాడాకు అభినందనలు. అది కూడా ఈ ఫార్మాట్‌లో అత్యుత్తమ స్ట్రైక్‌రేట్‌ సాధించిన దిగ్గజాల్లో ఒకడిగా నిలిచాడు. అయితే, ఇప్పుడతడి వయస్సు 25 ఏళ్లే. భవిష్యత్‌లో అతడు సాధించేది ఆలోచిస్తే భయమేస్తుంది’ అని జాఫర్‌ ప్రశంసించాడు.

ఇవీ చదవండి..
ఇంట్లో వాళ్లు తొందరపెడుతున్నారు: పంత్‌
పరిమిత ఓవర్ల క్రికెట్‌ ఆడాలని ఉంది: పుజారా