Viral Video: ఇలాంటి క్యాచ్‌.. మీరెప్పుడూ చూసి ఉండరు..!

ఇంటర్నెట్‌డెస్క్‌: క్రికెట్‌లో అప్పుడప్పుడూ చిత్ర విచిత్రమైన సంఘటనలు చోటుచేసుకుంటాయి. ఒక్కోసారి అవి కడుపుబ్బా నవ్విస్తాయి. తాజాగా విలేజ్‌ లీగ్‌ క్రికెట్‌ మ్యాచ్‌లో అలాంటి ఘటనే జరిగింది. ఇంగ్లాండ్‌లోని అల్‌డ్విక్‌ క్రికెట్‌ క్లబ్‌, లింగ్‌ఫీల్డ్ క్రికెట్‌ క్లబ్‌ జట్ల మధ్య గురువారం ఓ క్రికెట్‌ మ్యాచ్‌ జరిగింది. ఈ సందర్భంగా అల్‌డ్విక్‌ జట్టుకు చెందిన అలెక్స్‌ రైడర్‌ అనే 16 ఏళ్ల యువ బౌలర్‌ విసిరిన ఓ బంతిని బ్యాట్స్‌మెన్‌ గాల్లోకి ఆడాడు. ఆ బంతి బౌలర్‌ దగ్గరకే రావడంతో దాన్ని క్యాచ్‌ అందుకునే ప్రయత్నం చేశాడు. కానీ, అదే సమయంలో అతడు వెనక్కి పడిపోవడంతో క్యాచ్‌ చేజారి బంతి కిందపడేలా కనిపించింది. అయితే, అప్పుడు ఆ బంతి బౌలర్‌ కుడి కాలుకు తాకి మళ్లీ గాల్లోకి లేచింది. దీంతో రెండోసారి వచ్చిన అవకాశాన్ని అతడు సద్వినియోగం చేసుకొని మళ్లీ క్యాచ్‌ను ఒడిసిపట్టాడు. దీంతో అలెక్స్‌ ఊహించని విధంగా ప్రత్యర్థి బ్యాట్స్‌మన్‌ను ఔట్‌ చేశాడు. ఈ క్యాచ్‌ను చూసిన తోటి ఫీల్డర్లు సైతం అలెక్స్‌ అద్భుతాన్ని నమ్మలేకపోయారు. దీంతో ఆ బ్యాట్స్‌మన్‌ కూడా ఆశ్చర్యం వ్యక్తం చేస్తూ నిరాశగా వెనుదిరిగాడు. ఆ వీడియోను సామాజిక మాధ్యమాల్లో పంచుకోవడంతో అది ఇప్పుడు వైరల్‌గా మారింది. మీరూ చూసేయండి.