Indonesian MotoGP: వామ్మో.. బైక్‌ రేసింగ్‌లో ఒళ్లు గగుర్పొడిచే వీడియో

ఇంటర్నెట్‌డెస్క్‌: రేసింగ్ అంటేనే ప్రాణాలతో చెలగాటం ఆడటం. ముఖ్యంగా బైక్‌ రేసర్లకు ట్రాక్‌ మీద ఏ చిన్న తప్పు దొర్లినా అది ఊహించని ప్రమాదాలకు దారితీస్తుంది. అచ్చం అదే జరిగింది మోటో గ్రాండ్‌ ప్రీలో  ఆరుసార్లు ఛాంపియన్‌గా నిలిచిన మార్క్‌ మార్కెజ్‌ విషయంలో. ఆదివారం జరిగిన ఇండోనేషియన్‌ మోటోగ్రాండ్‌ ప్రీ తుదిపోరుకు ముందు మార్క్‌ ప్రాక్టీస్‌ చేస్తుండగా ప్రమాదానికి గురయ్యాడు. దీంతో అతడు గాయపడ్డాడు.

ఆదివారం ఉదయం ఏడో నంబర్‌ మలుపు వద్ద బైక్‌ అదుపుతప్పడంతో.. పల్టీలు కొడుతూ గాల్లో ఎగిరిపడ్డాడు. ఒళ్లు గగుర్పొడిచే ఆ వీడియో ఆన్‌లైన్‌లో వైరల్‌గా మారింది. అయితే, కిందపడిన వెంటనే తేరుకున్న మార్క్‌ పైకి లేచి నెమ్మదిగా నడిచివస్తూ కనిపించాడు. వెంటనే అతడిని ఆస్పత్రికి తరలించగా కంకషన్‌కు గురయ్యాడని వైద్యులు పేర్కొన్నారు. పూర్తి ఫిట్‌నెస్‌తో లేని కారణంగా ఈ మాజీ ఛాంపియన్‌ ఇండోనేషియన్‌ మోటో గ్రాండ్‌ ప్రీ తుది పోరులో పాల్గొనలేక పోయాడు. మరోవైఫు ఫైనల్లో ప్రస్తుత ప్రపంచ ఛాంపియన్‌ ఫాబియో క్వార్‌టారరోను.. మిగెల్‌ ఒలివీరా ఓడించాడు.