Mitali Parulekar: అంకుర సంస్థ స్థాపించి.. శార్దూల్‌తో ఏడడుగులు వేసి!

ఇంటర్నెట్‌డెస్క్: టీమ్‌ఇండియా ఆల్‌రౌండర్‌ శార్దూల్‌ ఠాకూర్‌ (Shardul Thakur) ఓ ఇంటివాడయ్యాడు. తన ప్రేయసి మిథాలీ పారుల్కర్‌ (Mitali Parulekar)తో ఏడడుగులు వేశాడు. గత కొన్నాళ్లుగా వీరిద్దరి మధ్య ప్రేమవ్యవహారం నడిచింది.  ఇరు కుటుంబాలు అంగీకరించడంతో గతేడాది నవంబరులో నిశ్చితార్థం జరిగింది. సోమవారం రాత్రి ముంబయిలో ఓ ఫంక్షన్‌ హాల్‌లో వీరిద్దరూ ఒక్కటయ్యారు. ఇంతకీ ఎవరీ మిథాలీ పారుల్కర్‌?

బేకరీ సంస్థను స్థాపించి..

మిథాలీ పారుల్కర్‌.. ఓ బిజినెస్‌ పర్సన్‌. మహారాష్ట్రలోని థానేలో ‘ఆల్‌ ది జాజ్‌.. లగ్జరీ బేకర్స్‌’ పేరుతో ఓ బేకరీ సంస్థను నెలకొల్పారు. ముంబయిలోనూ ఈ సంస్థకు కార్యాలయాలున్నాయి. 2020 ఫిబ్రవరిలో ఈ సంస్థను  ఏర్పాటు చేసిన  మిథాలీ.. అదే పేరుతో ఓ వెబ్‌సైట్‌ను కూడా ప్రారంభించారు. వివిధ రకాల కేక్‌లు, కుకీస్‌, బ్రెడ్‌ తదితర బేకరీ ఉత్పత్తులను ఆన్‌లైన్‌లోనూ, నేరుగా విక్రయిస్తూ విశేష ఆదరణ పొందుతున్నారు. సామాజిక మాధ్యమాల్లో మిథాలీ చురుగ్గా ఉంటుంది.

కెరీర్‌ సాగిందిలా..  

అంకుర సంస్థ స్థాపించి విజయం సాధించిన మిథాలీ పారుల్కర్‌.. వ్యాపారవేత్తగా మంచి పేరు సంపాదించారు. శార్దూల్‌ ఠాకూర్‌తో ఎంగేజ్‌మెంట్‌ అయిన తర్వాత ఆమె క్రేజ్‌ మరింత పెరిగిపోయింది. ఇంటర్నెట్‌లో ఆమె కోసం విరివిగా సెర్చ్‌ చేశారు. మిథాలీ పారుల్కర్ 1992లో మహారాష్ట్రలోని కొల్హాపూర్‌లో ఓ పేరున్న కుటుంబంలో జన్మించారు. విద్యాభ్యాసమంతా ముంబయిలోనే సాగింది. 2014లో మిథీబాయ్‌ కళాశాల నుంచి ఆమె గ్రాడ్యుయేషన్‌ పూర్తి చేశారు. ఆ తర్వాత 2015లో ఉద్యోగ జీవితం ప్రారంభించిన ఆమె.. బహుళజాతి సంస్థ జేఎస్‌డబ్ల్యూలో ఇంటర్న్‌షిప్‌లో చేరారు. ఆ తర్వాత 2017లో బ్లూస్టార్‌ డైమండ్స్‌లో కంపెనీ సెక్రెటరీగా పని చేశారు. 2018 అక్టోబరు వరకు అందులోనే పని చేసిన ఆమె ఉద్యోగానికి రాజీనామా చేశారు. చేతక్‌ ఎంటర్‌ప్రైజెస్‌ లిమిటెడ్‌ సంస్థ సెక్రెటరీగా 2019 మేలో ఉద్యోగం మారారు. 2020 వరకు ఆ సంస్థలో పని చేశారు. ఈ సమయంలోనే మోడలింగ్‌ చేసేందుకు ఆసక్తి చూపినా పెద్దగా ఫలితం ఇవ్వకపోవడంతో ఆ రంగాన్ని వదిలేశారు. చివరికి ఫిబ్రవరి 2020లో సొంతగా బేకరీ సంస్థను నెలకొల్పి వ్యాపారం కొనసాగిస్తున్నారు. థానేలో చదువుకుంటున్న రోజుల్లోనే శార్దూల్‌తో ప్రేమలో పడ్డారు.

మిథాలీ గురించి ఇంకాస్త..

• ఇష్టమైన నటుడు- ఆమిర్‌ ఖాన్‌
• నచ్చిన ఆహారం.. శాకాహారం
• ఇష్టమైన గాయకుడు -అఖిల్‌
• ఇష్టమైన ఆట -క్రికెట్‌
• నచ్చిన ప్రదేశం - ఇరాక్
•  పెంపుడు జంతువులంటే బాగా ఇష్టం