INDW vs AUSW: ఆసీస్‌ చేతిలోనూ భారత్ ఓటమి.. ప్రపంచకప్‌లో ఇకపై అన్నీ గెలవాల్సిందే!

(Photo: Australia Womens cricket Twitter)

ఇంటర్నెట్‌డెస్క్‌: ఐసీసీ మహిళల వన్డే ప్రపంచకప్‌లో టీమ్‌ఇండియా మరో ఓటమి చవిచూసింది. ఆస్ట్రేలియాతో గెలవాల్సిన మ్యాచ్‌లో పరాజయం పాలైంది. మిథాలీ సేన నిర్దేశించిన 278 పరుగుల లక్ష్యాన్ని ఆ జట్టు నాలుగు వికెట్లు కోల్పోయి 49.3 ఓవర్లలో ఛేదించింది. ఆసీస్‌ టాప్‌ ఆర్డర్‌ మొత్తం రాణించడంతో ఆ జట్టు 6 వికెట్ల తేడాతో ఘన విజయం సాధించింది. ఓపెనర్లు రేచల్‌ హేన్స్‌ (43; 53 బంతుల్లో 5x4), అలిస్సా హేలీ (72; 65 బంతుల్లో 9x4) శుభారంభానికి తోడు కెప్టెన్‌ మెగ్‌ లానింగ్‌ (97; 107 బంతుల్లో 13x4) భారీ స్కోర్‌ చేసింది. మధ్యలో ఎల్లీసి పెర్రి (28; 51 బంతుల్లో 1x4) కెప్టెన్‌కు సహకరించగా.. చివర్లో బెత్‌ మూనీ (30 నాటౌట్‌; 20 బంతుల్లో 4x4) ధాటిగా ఆడి ఆసీస్‌ను విజయ తీరాలకు చేర్చింది. ఈ ఓటమితో టీమ్‌ఇండియా ఇకపై ప్రపంచకప్‌లో ప్రతి మ్యాచ్‌ గెలవాల్సిన పరిస్థితి నెలకొంది. మరోవైపు ఆసీస్‌ పాయింట్ల పట్టికలో అగ్రస్థానంలో కొనసాగుతూ సెమీస్‌కు చేరువైంది.

అంతకుముందు టాస్‌ ఓడి బ్యాటింగ్‌కు దిగిన భారత్‌ 7 వికెట్ల నష్టానికి 277 పరుగుల భారీ స్కోర్‌ చేసింది. ఓపెనర్లు స్మృతి మంధాన (10), షెఫాలీ వర్మ (12) విఫలమైనా.. కెప్టెన్‌ మిథాలీ రాజ్‌ (68; 96 బంతుల్లో 4x4, 1x6), యస్తిక భాటియా (59; 83 బంతుల్లో 6x4), హర్మన్‌ ప్రీత్‌ కౌర్‌ (57 నాటౌట్‌; 47 బంతుల్లో 6x4) అర్ధ శతకాలతో రాణించారు. చివర్లో పూజా వస్త్రాకర్‌ (34; 28 బంతుల్లో 1x4, 2x6) మెరుపు ఇన్నింగ్స్‌ ఆడటంతో.. టీమ్‌ఇండియా కంగారూల ముందు మంచి లక్ష్యాన్నే నిర్దేశించింది. అయితే, బౌలింగ్‌లో గాడి తప్పిన భారత్‌ను ఆసీస్‌ మహిళలు ఆటాడుకున్నారు. చివరికి మూడు బంతులు మిగిలుండగానే విజయం సాధించారు.