WPL: మహిళల ప్రీమియర్‌ లీగ్‌.. ఫిబ్రవరి రెండో వారంలోనే వేలం!

ఇంటర్నెట్ డెస్క్‌: తొలి మహిళల ప్రీమియర్‌ లీగ్‌ (WTL) నిర్వహణ కోసం భారత క్రికెట్ నియంత్రణ మండలి (బీసీసీఐ) వడివడిగా అడుగులేస్తోంది. ఇప్పటికే ఐదు ఫ్రాంచైజీలను వెల్లడించిన బీసీసీఐ.. వేలం నిర్వహించేందుకూ ఏర్పాట్లు చేస్తోంది. తొలుత ఫిబ్రవరి 6న వేలం నిర్వహించాలని యోచించగా.. ఇప్పుడు రెండో వారంలో వేలం ఉంటుందని వార్తలు వస్తున్నాయి. ఫిబ్రవరి 11న లేదా ఫిబ్రవరి 13న ఉండే అవకాశం ఉంది. ఈ వారంలోనే బీసీసీఐ తుది నిర్ణయం ప్రకటించే అవకాశం ఉంది. అలాగే మార్చి 4 నుంచి మార్చి 24 వరకు మెగా టోర్నీని కూడా నిర్వహించాలని చూస్తున్నట్లు సమాచారం. 

ఐదు ఫ్రాంఛైజీల యాజమాన్యాలకు ఇప్పటికే టీ20 లీగ్‌ జట్లు ఉన్నాయి. అబుదాబి వేదికగా ఐఎల్‌టీ 20, దక్షిణాఫ్రికా టీ20 లీగ్‌ల ఫైనల్‌ మ్యాచ్‌లు ఫిబ్రవరి 11, ఫిబ్రవరి 12 తేదీల్లో జరుగుతాయి. ఈ క్రమంలో ఆ రెండు లీగ్‌ ఫైనల్‌ మ్యాచ్‌లకు ఎలాంటి ఇబ్బంది లేకుండా మరో తేదీని బీసీసీఐ ఎంచుకొనే అవకాశం ఉంది. ఐదు ఫ్రాంచైజీల కోసం ఆయా యాజమాన్యాలు దాదాపు రూ. 4,700 కోట్లను వెచ్చించాయి. ముంబయి ఇండియన్స్, దిల్లీ క్యాపిటల్స్, రాయల్‌ ఛాలెంజర్స్‌ బెంగళూరు ఓనర్లతోపాటు అదానీ గ్రూప్, కాప్రి గ్లోబల్‌ ఈ జట్లను సొంతం చేసుకొన్న విషయం తెలిసిందే. ఆయా ఫ్రాంఛైజీలు తమ కోచింగ్‌, సహాయక సిబ్బందిని నియమించుకొనేందుకు తగినంత సమయం ఇవ్వాలనే ఉద్దేశంతోనే వేలంను ఫిబ్రవరి 6వ తేదీ నుంచి వాయిదా వేయాలని బీసీసీఐ నిర్ణయించింది.