CoronaVirus: భారత జట్టులో మరో ఇద్దరికి కరోనా!

ఇంటర్నెట్‌డెస్క్‌: శ్రీలంకలో పర్యటిస్తున్న టీమ్‌ఇండియా జట్టులో తాజాగా మరో ఇద్దరికి కరోనా వైరస్‌ పాజిటివ్‌గా తేలింది. అందులో ఒకరు స్పిన్నర్‌ యుజువేంద్ర చాహల్‌ కాగా మరొకరు కృష్ణప్ప గౌతమ్‌ అని తెలిసింది. వీరిద్దరికి వైరస్‌ నిర్ధరణ అయినట్లు అక్కడి అధికారులు మీడియాకు చెప్పారు. ఇటీవల రెండో టీ20కు ముందు కృనాల్‌ పాండ్య తొలుత వైరస్‌ బారినపడ్డాడు. అతడితో సన్నిహితంగా ఉన్న మరో ఎనిమిది మంది ఆటగాళ్లను ఐసోలేషన్‌కు తరలించారు. అందులో చాహల్‌, కృష్ణప్ప ఉండటం గమనార్హం. దాంతో వారిద్దరికి పాజిటివ్‌గా తేలింది. ఈ క్రమంలోనే వారిద్దరూ గత రెండు టీ20ల్లో ఆడలేకపోయారు. మరోవైపు ప్రధాన ఆటగాళ్లు లేకపోయినా టీమ్‌ఇండియా చివరి రెండు మ్యాచ్‌ల్లో పాల్గొని షెడ్యూల్‌ను అనుకున్నట్లే పూర్తి చేసింది. అయితే, 2-1 తేడాతో సిరీస్‌ కోల్పోయింది. ఇక పాజిటివ్‌గా తేలిన ముగ్గురు ఆటగాళ్లు శ్రీలంకలో ఉంటుండగా మిగతా జట్టు సభ్యులు నేడు భారత్‌కు తిరిగొస్తున్నారు. అంతకుముందు టీమ్‌ఇండియా 2-1 తేడాతో వన్డే సిరీస్‌ కైవసం చేసుకున్న సంగతి తెలిసిందే.