మా బడిలో చేరని టీచర్లకు జీతాలు ఆపండి

‘మా పాఠశాలకు కేటాయించిన టీచర్లను మాకు పంపండి.. లేదంటే వారికి జీతాలు ఆపండి..’ అంటూ విద్యార్థులు నల్గొండ జిల్లా కేంద్రంలో కలెక్టరేట్‌, డీఈవో కార్యాలయం ఎదుట ప్లకార్డులతో నిరసన తెలిపారు. ‘డీఈవో జారీ చేసిన ఆర్డర్‌కే విలువ లేకుంటే ఎలా’ అని ప్రశ్నించారు. చండూరు మండలం బోడంగిపర్తిలోని ఎంజీఎం జడ్పీ ఉన్నత పాఠశాలకు డీఈవో గత నెల 27న నలుగురు ఉపాధ్యాయులను తాత్కాలిక సర్దుబాటు కింద నియమించారు. బోడంగిపర్తి దూరంగా ఉందన్న ఉద్దేశంతో ఆ ఉపాధ్యాయులు విధుల్లో చేరకుండా ఇతర పాఠశాలలకు హాజరవుతున్నారు. విషయం తెలుసుకున్న ఆ పాఠశాల విద్యార్థులు సోమవారం 35 కి.మీ.ల దూరంలోని నల్గొండకు చేరుకుని ఉపాధ్యాయుల తీరుపై నిరసన తెలుపుతూ నినాదాలు చేశారు. సమస్య పరిష్కరిస్తానని డీఈవో భిక్షపతి హామీ ఇవ్వడంతో ఆందోళన విరమించారు.

-న్యూస్‌టుడే, నల్గొండ విద్యావిభాగం