స్వామినాథన్‌ అవార్డుకు ప్రవీణ్‌రావు ఎంపిక

ఈనాడు, హైదరాబాద్‌: ప్రతిష్ఠాత్మక ఎం.ఎస్‌.స్వామినాథన్‌ జాతీయ అవార్డుకు ఆచార్య జయశంకర్‌ వ్యవసాయ విశ్వవిద్యాలయం ఉపకులపతి(వీసీ) వి.ప్రవీణ్‌రావు ఎంపికయ్యారు. ‘భారత వ్యవసాయ పరిశోధనామండలి’(ఐసీఏఆర్‌) విశ్రాంత ఉద్యోగుల సంఘం, నూజివీడు సీడ్స్‌ కంపెనీ సంయుక్తంగా రెండేళ్లకోసారి ఈ అవార్డును ప్రకటిస్తున్నాయి. ఐసీఏఆర్‌ విశ్రాంత డైరెక్టర్‌ జనరల్‌ ఆర్‌.ఎస్‌.పరోడా అధ్యక్షతన 13 మంది జాతీయస్థాయి శాస్త్రవేత్తల కమిటీ ప్రవీణ్‌రావును ఎంపిక చేసింది. వ్యవసాయ పరిశోధన, విస్తరణ, బోధన, పరిపాలన అంశాల్లో ఆయన చేసిన విశేష కృషిని గుర్తించి ఈ పురస్కారానికి ఎంపిక చేసినట్లు ప్రకటించింది. డిసెంబరు 8న హైదరాబాద్‌లో ఉపరాష్ట్రపతి వెంకయ్యనాయుడు చేతులమీదుగా ఈ అవార్డును అందజేస్తారు.