ఆ వ్యాఖ్యలకు విలువ ఉందనుకోవడం లేదు

ఏపీఎన్జీవో అధ్యక్షుడు శ్రీనివాసరావు వ్యాఖ్యలపై సజ్జల

ఈనాడు, అమరావతి: ‘మేం ప్రభుత్వాన్ని కూల్చొచ్చు. మా శక్తి ముందు ఎవరైనా తలదించాల్సిందేనంటూ ఏపీఎన్జీవో అధ్యక్షుడు బండి శ్రీనివాసరావు చేసిన వ్యాఖ్యలకు విలువ ఉందని నేను అనుకోవడం లేదు’ అని ఏపీ ప్రభుత్వ సలహాదారు సజ్జల రామకృష్ణారెడ్డి పేర్కొన్నారు. ‘ఎవరికి వారు ప్రెజర్‌ గ్రూపు అనుకుని, ఎన్నికల్లో మేం చెప్పిందే చేయగలం అంటే ఎన్నికలప్పుడు ఆ గ్రూపును సంతృప్తిపరిచి ప్రభుత్వాన్ని నిర్వహించుకోవచ్చు. ఉత్తేజం నింపేందుకు ఆ వ్యాఖ్యలు చేసి ఉండొచ్చు. లేదు అదే వారి అభిప్రాయమైతే వారూ ఒక రాజకీయ పార్టీ పెట్టుకుని రావచ్చు. ఉద్యోగులూ ప్రజల్లో భాగమే కాబట్టి వాళ్లనుకుంటే దాని ప్రభావం ఉంటుంది. ఉన్న పరిస్థితిని వారు అర్థం చేసుకుని సంయమనంతో ఉంటారని ఆశిస్తున్నాం’ అని సజ్జల వ్యాఖ్యానించారు.