అకాల వర్షాలతో 34 వేల ఎకరాల్లో పంటనష్టం

ఈనాడు, హైదరాబాద్‌: గత పది రోజుల వ్యవధిలో రాష్ట్రంలో కురిసిన అకాల వర్షాలకు 34 వేల ఎకరాల్లో పంటలు దెబ్బతిన్నట్లు వ్యవసాయశాఖ ప్రాథమికంగా అంచనా వేసింది. వరంగల్‌, హనుమకొండ, జయశంకర్‌ తదితర జిల్లాల్లో వడగండ్ల వానల కారణంగా మొక్కజొన్న, సెనగ, వేరుసెనగ, జొన్న, మిరప తదితర పంటలకు ఎక్కువ నష్టం జరిగినట్టు తేల్చింది. ఉద్యానశాఖ పరిధిలో ఉన్న మిరప, కూరగాయలు, పసుపు తదితర పంటల నష్టాలపై ఈ శాఖ విడిగా అంచనాలు సిద్ధం చేస్తోంది. మిరప తోట సాగుకు రైతులు ఎకరానికి రూ.లక్షకు పైగా పెట్టుబడి పెట్టారు. వడగండ్లకు మిరపకాయలు రాలడంతోపాటు, చెట్లు నేలవాలడంతో అపారనష్టం వాటిల్లింది.