రూ.7411.52 కోట్లరైతుబంధు నిధుల జమ

ఈనాడు, హైదరాబాద్‌: రాష్ట్రంలో 62.99 లక్షల మంది రైతుల ఖాతాల్లో రూ.7,411.52 కోట్ల రైతుబంధు నిధులు జమ చేసినట్లు వ్యవసాయశాఖ మంత్రి నిరంజన్‌రెడ్డి గురువారం ఒక ప్రకటనలో తెలిపారు. 1,48,23,000 ఎకరాలకు ఈ నిధులు విడుదలయ్యాయన్నారు. అత్యధికంగా నల్గొండ జిల్లాలో 4,69,696 మందికి దాదాపు రూ.601 కోట్లు, సంగారెడ్డి జిల్లాలో 3,18,988 మందికి రూ.370 కోట్లు, నాగర్‌కర్నూల్‌ జిల్లాలో 2,77,920 మందికి రూ.367 కోట్లు జమయ్యాయన్నారు. 60శాతం జనాభా ఆధారపడిన వ్యయసాయ రంగం విషయంలో కేంద్రం ఒక జాతీయ విధానం అవలంబించడంతో పాటు ఉపాధిహామీని వ్యవసాయ రంగానికి అనుసంధానం చేయాలని కోరారు.