టీవీ పాఠాలు చూస్తున్నవారు 63 శాతం

గణాంకాలు విడుదల చేసిన పాఠశాల విద్యాశాఖ

ఈనాడు, హైదరాబాద్‌: రాష్ట్రవ్యాప్తంగా ప్రభుత్వ పాఠశాలల్లో 8, 9, 10 తరగతుల విద్యార్థుల్లో 63.38 శాతం మంది టీవీల్లో ప్రసారమయ్యే డిజిటల్‌ పాఠాలు వీక్షిస్తున్నారు. ఈ మేరకు పాఠశాల విద్యాశాఖ మంగళవారం గణాంకాలను విడుదల చేసింది. ఈనెల 24 నుంచి టీశాట్‌(విద్యా ఛానెల్‌) ద్వారా పాఠాలను ప్రసారం చేస్తున్న సంగతి తెలిసిందే. మొత్తం 8, 9, 10 తరగతుల విద్యార్థులు 7,19,385 మంది ఉండగా వారిలో 3,07,154 మంది(42.70 శాతం) టీశాట్‌ ద్వారా పాఠాలు చూశారు. మరో 1,31,130 మంది (18.23 శాతం) స్మార్ట్‌ ఫోన్లు/ల్యాప్‌ట్యాప్‌ల ద్వారా వీక్షించారు. ఇంకా 16,571 మంది తోటి విద్యార్థుల వద్ద ఉన్న ఫోన్ల ద్వారా.. 1,057 మంది గ్రామ పంచాయతీల్లో ఉన్న టీవీల ద్వారా పాఠాలు తిలకించారు. అంటే మొత్తం 4,55,912 మంది (63.38 శాతం) టీవీ పాఠాలు వినియోగించుకున్నారని అధికారులు వెల్లడించారు. ఈ మూడు తరగతుల్లో 36,440 మంది పిల్లలకు పాఠాలు వీక్షించేందుకు ఏ ఒక్క పరికరం లేదు. మొత్తం 19,526 వాట్సాప్‌ గ్రూపులు రూపొందించి ఉపాధ్యాయులు పర్యవేక్షిస్తున్నారు.