National Highway: కల్వకుర్తి- నంద్యాల జాతీయ రహదారి మార్గ ప్రణాళిక ఖరారు

ఈనాడు, హైదరాబాద్‌: తెలంగాణ-ఆంధ్రప్రదేశ్‌ రాష్ట్రాల మధ్య కృష్ణా నది మీదుగా నిర్మించే జాతీయ రహదారి మార్గ ప్రణాళికను కేంద్ర రవాణా, జాతీయ రహదారుల మంత్రిత్వశాఖ ఖరారు చేసింది. దీని ప్రకారం కల్వకుర్తి (తెలంగాణ)- నంద్యాల (ఆంధ్రప్రదేశ్‌) మధ్య 173.73 కిలోమీటర్ల మేర మార్గాన్ని నిర్మించనున్నారు. దీనికి జాతీయ రహదారి(ఎన్‌హెచ్‌ 167కే) నంబరు కేటాయించారు. రెండు రాష్ట్రాల మధ్య అనుసంధానం గణనీయంగా పెరిగేందుకు ఈ మార్గం ఉపకరించనుంది. ఈ మార్గాన్ని ఇతర జాతీయ రహదారుల మాదిరిగా 100 కిలోమీటర్ల వేగంతో వాహనాలు రాకపోకలు సాగించేందుకు వీలుగా నిర్మించాలని కేంద్రం స్పష్టం చేసింది. ఈ మార్గంలో చేపట్టే బైపాస్‌రోడ్ల అలైన్‌మెంటు మార్పులను ఆమోదించింది. తెలంగాణలోని కల్వకుర్తి, నాగర్‌కర్నూల్‌, కొల్లాపూర్‌, రాంపూర్‌, ఆంధ్రప్రదేశ్‌ లోని మండుగుల, శివాపురం, కరివేన మీదుగా నంద్యాల వరకు మార్గాన్ని నిర్మించేందుకు కేంద్రం గతంలో ఆమోదించింది. ఈ మార్గంలో రెండు రాష్ట్రాలకు అనుసంధానంగా కృష్ణా నదిపై సోమశిల వద్ద వంతెనను ఐకానిక్‌ బ్రిడ్జిగా నిర్మించాలని కేంద్రం సూచించింది. అందుకు సంబంధించిన మార్గ ప్రణాళికల్లో మార్పులను సైతం ఆమోదించింది. ఈ మార్గంలోని పది ప్రాంతాల్లో బైపాస్‌ రోడ్లు, జంక్షన్ల అభివృద్ధికి ప్రణాళికలను సిద్ధం చేశారు.