AB devilliers: వచ్చే సీజన్లో మళ్లీ టీ20 లీగ్‌లోకి వస్తా..: ఏబీ డివిలియర్స్‌

జొహానెస్‌బర్గ్‌: వచ్చే సీజన్లో మళ్లీ టీ20 లీగ్‌లో కనబడతానని దక్షిణాఫ్రికా దిగ్గజం ఏబీ డివిలియర్స్‌ చెప్పాడు. బెంగళూరు జట్టులో కీలక ఆటగాడిగా ఉన్న ఏబీ గతేడాదే  టీ20 లీగ్‌ నుంచి తప్పుకున్నాడు. అయితే వచ్చే సీజన్లో కొత్త పాత్రలో తిరిగి  బెంగళూరుతో చేరే అవకాశాలున్నాయి. ‘‘నేను తిరిగి  టీ20 లీగ్‌కు వస్తానన్న విషయాన్ని స్నేహితుడు విరాట్‌ ముందే రూఢి చేసినందుకు సంతోషం. నిజం చెప్పాలంటే ఈ విషయంపై ఇంకా పూర్తిగా నిర్ణయం తీసుకోలేదు. కానీ కచ్చితంగా వచ్చే ఏడాది టీ20 లీగ్‌లో కనిపిస్తానని నమ్ముతున్నా. అయితే ఏ పాత్రలో అనేది ఇంకా తెలియదు. వచ్చే ఏడాది బెంగళూరులోనూ కొన్ని టీ20 లీగ్‌ మ్యాచ్‌లు ఉంటాయని తెలిసింది. నా రెండో సొంతగడ్డకు రావడానికి తహతహలాడుతున్నా. కిక్కిరిసిన చిన్నస్వామి స్టేడియాన్ని మళ్లీ చూడాలని ఉంది’’ అని ఏబీ చెప్పాడు. బెంగళూరు తరఫున డివిలియర్స్‌ 39.71 సగటుతో 5162 పరుగులు చేశాడు. ఇందులో 3 సెంచరీలు, 40 అర్ధసెంచరీలు ఉన్నాయి.