Virender Sehwag: డేవిడ్‌ వార్నర్‌ ప్రాక్టీస్‌ తక్కువ.. పార్టీలు ఎక్కువ: సెహ్వాగ్‌

దిల్లీ: వీరేంద్ర సెహ్వాగ్‌ 2009లో దిల్లీ కెప్టెన్‌. ఆ సీజన్‌కు ఆ జట్టుతో ఉన్న వార్నర్‌కు సంబంధించిన ఓ ఆసక్తికరమైన విషయాన్ని చెప్పాడు వీరూ. అప్పుడు వార్నర్‌ను నియంత్రించడం కష్టమైందని, అతడు డ్రెస్సింగ్‌రూమ్‌లో కొన్నిసార్లు గొడవలు పడ్డాడని తెలిపాడు. ‘‘నేను కూడా కొందరు ఆటగాళ్లపై అసహనం వ్యక్తం చేశాను. అందులో వార్నర్‌ కూడా ఉన్నాడు. జట్టుతో చేరిన కొత్తలో అతడు ప్రాక్టీస్‌, మ్యాచ్‌ల కంటే పార్టీలకే ప్రాధాన్యం ఇచ్చేవాడు. కొందరు ఆటగాళ్లతో గొడపడడంతో చివరి రెండు మ్యాచ్‌ల్లో ఆడనివ్వకుండా అతణ్ని ఇంటికి పంపించాం. పాఠం చెప్పాలంటే కొన్నిసార్లు కొందరిని పక్కన పెట్టక తప్పదు. అతడు అప్పుడు జట్టుకు కొత్త. ‘నువ్వొక్కడివే కాదు.. జట్టులో అందరూ ముఖ్యం’ అని చూపించడం చాలా ముఖ్యం. ఆడి జట్టును గెలిపించే ఆటగాళ్లు ఇంకా ఉన్నారు. వార్నర్‌ను దూరం పెట్టి  మేం గెలిచాం కూడా’’ అని సెహ్వాగ్‌ చెప్పాడు.