Punjab vs Bangalore: బెంగళూరుపై పులి.. ఇతర జట్లపై పిల్లి.. పంజాబ్‌పై విమర్శలు

ఇంటర్నెట్‌డెస్క్‌: భారత టీ20 లీగ్‌లో ఇప్పటివరకు ట్రోఫీ అందుకోని వాటిల్లో బెంగళూరు, పంజాబ్‌ జట్లు కొనసాగుతూనే ఉన్నాయి. ఈ టోర్నీ ప్రారంభమై 15 సీజన్లు పూర్తికావస్తున్నా ఇంకా తొలి కప్పు కోసం నిరీక్షిస్తూనే ఉన్నాయి. అయితే, గత మూడేళ్లుగా ఈ రెండు జట్ల మధ్య జరుగుతున్న పోటీల్లో పంజాబ్‌దే ఆధిపత్యం. గతరాత్రి దిల్లీతో జరిగిన మ్యాచ్‌లో పంజాబ్‌ 160 పరుగుల మోస్తరు లక్ష్యాన్ని ఛేదించలేకపోయినా.. ఈ సీజన్‌లో బెంగళూరుపై రెండు సార్లు 200పైచిలుకు పరుగులు చేసి విజయాలు సాధించింది. అలాగే గత మూడేళ్లలో ఈ రెండు జట్లు ఆడిన ఆరు మ్యాచ్‌ల్లో ఐదింటిలో గెలుపొందింది. దీంతో ఇతర జట్లతో పిల్లిలా ఉండే పంజాబ్‌.. బెంగళూరుపై పులిలా చెలరేగుతుందని సామాజిక మాధ్యమాల్లో పోస్టులు దర్శనమిస్తున్నాయి. బెంగళూరు అవకాశాలను దెబ్బతీయడానికే పంజాబ్‌ ఆడుతున్నట్లుందని ఆ జట్టు అభిమానులు మండి పడుతున్నారు. మీమ్స్‌తోనూ అలరిస్తున్నారు.