శుక్రుడి మేఘాల్లో జీవం లేదు

శుక్రుడి మేఘాల్లో జీవం ఉండొచ్చనే ఆశలు నీరుగారాయి. అక్కడి మేఘాల్లో జీవుల పుట్టుకకు అవసరమైనంత నీటి ఆవిరి లేనే లేదని యూరప్‌, అమెరికా శాస్త్రవేత్తలు తేల్చేశారు. శుక్ర గ్రహం మీద సల్ఫ్యూరిక్‌ ఆమ్లంతో కూడిన మేఘాల్లో చిత్రమైన, చిన్న జీవులు దాగుండే అవకాశముందని గత సెప్టెంబరులో కొందరు శాస్త్రవేత్తలు ప్రకటించటం ఆశలు రేపింది. ఇది నిజమో కాదో తెలుసుకోవటానికి ఇటీవల ఉపగ్రహ చిత్రాల ద్వారా నిశితంగా పరిశీలించారు. భూమి మీదిలాంటి జీవుల ఉనికికి అవసరమైనదాంతో పోలిస్తే అక్కడి మేఘాల్లో 100 రెట్లు తక్కువ నీరున్నట్టు బయటపడింది. అంటే జీవుల పుట్టుకకు అక్కడ ఆస్కారమే లేదన్నమాట.