130 కోట్ల టన్నులు!

ప్రపంచవ్యాప్తంగా ఏటా ఎంత ఆహారం వ్యర్థమవుతోందో తెలుసా? సుమారు 130 కోట్ల టన్నులు! మొత్తం పండిన ఆహార పంటల్లో మూడో వంతు ఇలా నిరుపయోగకరంగా, వ్యర్థంగానే మారిపోతోంది. ఇది కుళ్లిపోతున్న కొద్దీ భూతాపాన్ని పెంచే వాయువులు పెద్ద మొత్తంలో విడుదలవుతాయి. అంటే మనం వంటకాలను కాదు.. భూమాతనే వండేస్తున్నామన్నమాట. ఆహారాన్ని వ్యర్థం చేయొద్దని తెలిసినా ఎందుకు పారేస్తున్నారు? దీనికి కారణాలేంటి? వీటిని తెలుసుకోవటానికీ ఎన్నో పరిశోధనలు జరిగాయి. ఏం కొనాలన్నది ముందే నిర్ణయించుకోకుండా, ఎడాపెడా అనవసరమైనవీ కొనటమే అన్నింటికన్నా పెద్ద కారణమని పరిశోధనలు చెబుతున్నాయి. సరిగా వంట చేయలేకపోవటం (మాడ్చేయటం వంటివి), అవసరమైన దాని కన్నా ఎక్కువెక్కువగా వండటం కూడా పెద్ద కారణాలుగానే నిలుస్తున్నాయి. కాబట్టి కొనేముందు, వండేముందు జాగ్రత్త అవసరం. వర్థ్యాలను నిలువరిస్తే మన భూమినీ కాపాడుకోవచ్చు.