పీత పెంకుల టీ షర్ట్‌!

పీత పెంకులతో టీ షర్ట్‌. అదీ చెమట కంపు కొట్టనిది! చాలా ఆశ్చర్యంగా ఉంది కదా. అలాంటి విచిత్రాన్నే సృష్టించారు ఆల్‌బర్డ్స్‌ కంపెనీ రూపకర్తలు. పీతల పెంకుల్లో చిటోసాన్‌ అనే పదార్థముంటుంది. దీంతో ట్రైనో అనే నూలును తయారుచేసి.. ఈ కొత్తరకం టీ షర్ట్‌ను రూపొందించారు. ఇది చాలాసేపు తాజాగా ఉంటుంది. నూలు ఉపరితలం గట్టిగా ఉండటం వల్ల చెమట కంపును కలిగించే బ్యాక్టీరియా దీని మీద వృద్ధి చెందదు. ఫలితంగా దీన్ని ఎక్కువసార్లు ఉతకాల్సిన అవసరముండదన్నమాట. పాలిస్టర్‌ టీ షర్ట్‌తో పోలిస్తే దీంతో వాతావరణంలోకి విడుదలయ్యే కార్బన్‌ 20% తక్కువని భావిస్తున్నారు. అటు పర్యావరణ హితం, ఇటు సౌకర్యం అంటే ఇదేనేమో.