ఆ సమయానికే మెసేజ్‌

మర్నాడు స్నేహితుడి పుట్టినరోజు. అర్ధరాత్రి 12 గంటలు దాటుతూనే మెసేజ్‌ పంపాలి. అప్పటివరకు మేల్కొని ఉంటామో లేదో. మధ్యలో నిద్ర ముంచుకొస్తే? అందరి కన్నా ముందే శుభాకాంక్షలు తెలపాలనే కోరిక అలాగే ఉండిపోతుంది. మరెలా? టెలిగ్రామ్‌ యాప్‌ ఉందిగా. ఇందులో మెసేజ్‌ను కచ్చితంగా ఎప్పుడు పంపాలో ముందే నిర్ణయించుకునే వెసులుబాటు ఉంది మరి. ముందుగా టెలిగ్రామ్‌ యాప్‌ను ఓపెన్‌ చేయాలి. నిర్ణీత సమయానికి సందేశాన్ని పంపించాలనుకునేవారితో మాటామంతీ ఆరంభించాలి. మెసేజ్‌ను టైప్‌ చేయాలి. కావాలనుకుంటే ఫొటో, వీడియోనూ జతచేయొచ్చు. అనంతరం మెసేజ్‌ మీద కాసేపు అలాగే నొక్కి పట్టుకోవాలి. అప్పుడు షెడ్యూల్‌ మెసేజ్‌ ఫీచర్‌ కనిపిస్తుంది. సెండ్‌ బటన్‌ మీద నొక్కి తేదీ, సమయాన్ని ఎంచుకోవాలి. సరిగ్గా ఆ సమయానికి మెసేజ్‌ మిత్రుడికి అందుతుంది. ఈ ఫీచర్‌ ద్వారా అవతలి వాళ్లు ఆన్‌లైన్‌లోకి వచ్చినప్పుడే మెసేజ్‌ను పంపించుకునే వెసులుబాటూ ఉంది.