ఇంజిన్యూటీ 25వ సారి!

అంగారకుడి మీదికి పర్‌సివియెరెన్స్‌ రోవర్‌తో పాటు పంపించిన మినీ హెలికాప్టర్‌ ‘ఇంజిన్యూటీ’ ఎప్పటికప్పుడు కొత్త రికార్డులు సృష్టిస్తోంది. ఐదుసార్లు మాత్రమే అంగారకుడి మీద ఎగరగలదని భావించిన ఇది తాజాగా 25వ ప్రయాణాన్ని పూర్తిచేసింది. కేవలం 1.8 కిలోల బరువు గల ఈ హెలికాప్టర్‌ ఇటీవల 704 మీటర్ల దూరం అంగారకుడి వాతావరణంలో ఎగిరింది. తొమ్మిదో ప్రయాణంలో సృష్టించిన రికార్డు కన్నా ఇది 80 మీటర్లు అధికం. సెకండుకు 5.5 మీటర్ల వేగంతో దూసుకు పోవటం మరో రికార్డు. అంగారకుడి వాతావరణంలో ఇది సుమారు 161.5 సెకండ్ల పాటు ఎగరగలదని నాసా అంచనా వేసింది. అనుకున్నట్టుగానే కాస్త తక్కువగా 161.3 సెకండ్ల పాటు ఎగిరింది. సౌరశక్తితో నడిచే ఇంజిన్యూటీ ఊహించిన దాని కన్నా ఎక్కువ సార్లు ఎగరటమే కాదు, ఇంకా సమర్థంగానే పనిచేస్తోంది. కాబట్టే దీని ప్రయోగ వ్యవధిని రోజురోజుకీ పొడిగిస్తూ వస్తున్నారు.