ఫోన్‌ పగిలినా పర్వాలేదు!

ఖరీదైన మొబైల్‌ ఫోన్‌. ముచ్చటపడి కొన్నాం. పొరపాటున కింద పడింది. పగిలిపోయింది. ఏం చేస్తాం? రిపేర్‌ చేయిస్తాం. లేదూ కొత్తది కొంటాం. కానీ మున్ముందు ఇలాంటి అవసరం ఉండకపోవచ్చు. మొబైల్‌ ఫోన్‌ దానంతటదే మరమ్మతు కావొచ్చు. బయటి నుంచి మనమేమీ చేయకుండానే పగుళ్లు పూడుకుపోయి యథాస్థితికి రావొచ్చు. అదెలా? పీజోఎలక్ట్రిక్‌ స్ఫటికాల మాయతో! కోల్‌కతాలోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌ ఎడ్యుకేషన్‌ అండ్‌ రీసెర్చ్‌ పరిశోధకులు ఐఐటీ ఖరగ్‌పుర్‌ సాయంతో కొత్తరకం పీజోఎలక్ట్రిక్‌ స్ఫటికాలను రూపొందించారు. బైపైరోజోల్‌ సేంద్రియ స్ఫటికాలుగా పిలుచుకునే వీటికి తమకు తామే మరమ్మతయ్యే గుణముంటుంది మరి. కింద పడటం వంటి యాంత్రిక ప్రభావాలకు లోనైనప్పుడివి విద్యుత్తు ఉత్పత్తి చేస్తాయి. అప్పుడు పగిలిపోయిన ముక్కలు కలుసుకునే చోట విద్యుదావేశం పుట్టుకొస్తుంది. దీంతో పగుళ్లు ఆకర్షితమై తిరిగి అతుక్కుపోతాయి.