విండోస్‌ 7, 8.1 వాడుతున్నారా?

విండోస్‌ 7, విండోస్‌ 8.1 ఓఎస్‌ పరికరాలు వాడుతున్నారా? అయితే విండోస్‌ 10, ఆపై ఓఎస్‌కు మారిపోవటం మంచిది. వచ్చే సంవత్సరం ఫిబ్రవరిలో విండోస్‌ 7, 8.1లకు సపోర్టు నిలిపేస్తున్నట్టు గూగుల్‌ ప్రకటించింది. కొత్త క్రోమ్‌ 110 వర్షన్‌ విడుదలతోనే దీన్ని అమలు చేయొచ్చని భావిస్తున్నారు. అంటే విండోస్‌ 7, 8.1 ఓఎస్‌లకు సపోర్టు చేయటం అధికారికంగా నిలిచి పోనుందన్నమాట. వీటికి కొత్త అప్‌డేట్లు అందవు. కానీ పాత క్రోమ్‌ వర్షన్‌ పనిచేస్తూనే ఉంటుంది. క్రోమ్‌ సెక్యూరిటీ అప్‌డేట్లు, కొత్త ఫీచర్లు కావాలంటే మాత్రం విండోస్‌ 10, ఆ తర్వాతి ఓఎస్‌లకు మారాల్సిందే. అన్ని బ్రౌజర్లలో అత్యంత దుర్బలమైన, దాడులకు అనువైనది క్రోమేనని ఇటీవల ఒక నివేదిక పేర్కొంది. అంటే వైరస్‌ల వంటివి దాడి చేయటానికి ఎక్కువ అవకాశం ఉందన్నమాట. కొత్త క్రోమ్‌ వర్షన్‌ వీటికి కళ్లెం వేయగలదని భావిస్తున్నారు. సెక్యూరిటీ అప్‌డేట్‌తో పటిష్టం కావొచ్చని అనుకుంటున్నారు. కాబట్టి పాత ఓఎస్‌లను వాడకపోవటమే మంచిదని అభిప్రాయ పడుతున్నారు.