కట్‌ అండ్‌ పేస్ట్‌

ట్రూకాలర్‌ యాప్‌ ద్వారా మనకు ఎవరు ఫోన్‌ చేస్తున్నారో ఇట్టే తెలుసుకుంటాం. కానీ దీంతో కాల్‌ రికార్డింగ్‌ కూడా చేసుకోవచ్చని తెలుసా? ఒకప్పుడిది డబ్బు చెల్లించినవారికే అందుబాటులో ఉండేది. ఇప్పుడు అందరికీ అందుబాటులోకి రానుంది. అయితే ఆండ్రాయిడ్‌ ఫోన్‌ వాడేవారికి.. అదీ ఆండ్రాయిడ్‌ 5.1 లేదా అంతకన్నా ఎక్కువ మోడల్‌ స్మార్ట్‌ఫోన్లలోనే వాడుకోవటానికి వీలుంటుంది. దీని ద్వారా అవుట్‌గోయింగ్‌, ఇన్‌కమింగ్‌ కాల్స్‌ అన్నీ రికార్డు చేసుకోవచ్చు. వద్దనుకుంటే ఎప్పుడంటే అప్పుడు ఆపేసుకోవచ్చు. అయితే హెడ్‌ఫోన్స్‌ ఉపయోగిస్తున్నప్పుడు కాల్‌ రికార్డు కాదు. తమ కాల్‌ను రికార్డు చేస్తున్నట్టు అవతలి వారికి తెలిసే అవకాశం లేదు. రికార్డయిన కాల్స్‌ ఆఫ్‌లైన్‌లోనే అందుబాటులో ఉంటాయి. సెటింగ్స్‌ ద్వారా స్టోరేజీలోకి వెళ్లి.. మ్యూజిక్‌ అండ్‌ ఆడియో ఫైల్స్‌లో వీటిని వెతుక్కోవచ్చు.

చెట్టో, పువ్వో అందంగా కనిపించింది. దాన్ని అప్పటికప్పుడే కాపీ చేసి, అలాగే ఫొటోషాప్‌లో పేస్ట్‌ చేస్తే? ‘ఏఆర్‌ కట్‌ అండ్‌ పేస్ట్‌’ యాప్‌ ఇలాంటి వెసులుబాటే కల్పిస్తుంది. దీంతో మనకు నచ్చినవాటిని ఫొటో తీసుకొని, పీసీలో ఫొటోషాప్‌ డాక్యుమెంటుకు ఎదురుగా తీసుకొచ్చి క్లిక్‌ చేస్తే చాలు. అవసరమైన చోట పేస్ట్‌ అవుతుంది. ఇది ఆయా వస్తువుల వెనక దృశ్యాలను తొలగించి దానంతటదే కటౌట్‌గానూ మార్చేస్తుంది. కాకపోతే ఇదింకా ప్రయోగాత్మక దశలోనే ఉంది. దీన్ని వాడుకోవటానికి పీసీలో ఫోటోషాప్‌ సాఫ్ట్‌వేర్‌ ఇన్‌స్టాల్‌ చేసుకొని ఉండాలి. అలాగే కంప్యూటర్‌లోని ఫొటోషాప్‌ను యాప్‌తో అనుసంధానం చేయటానికి లోకల్‌ సర్వరూ అవసరమే. ఒక్క ఫొటోషాప్‌లోనే కాదు.. మున్ముందు దీన్ని ఇతరత్రా ప్రోగ్రామ్‌లలోనూ వాడుకోవటానికి అనువుగానూ తీర్చిదిద్దటంపై దృష్టి సారించారు. మిషన్‌ లెర్నింగ్‌, కంప్యూటర్‌ విజన్‌ పరిజ్ఞానాలతో పనిచేసే ఇది ప్రజెంటేషన్లు, ఫొటో ఎడిటింగ్‌ వంటి పనులకు ఎంతగానో ఉపయోగపడుతుంది.