ఇన్‌స్టాగ్రామ్‌లో ఒక నిమిషం మ్యూజిక్‌!

ఇన్‌స్టాగ్రామ్‌ ట్రెండ్స్‌ విషయంలో సంగీతం పెద్ద ఆకర్షణగా నిలుస్తోంది. నిజానికి మ్యూజిక్, ఆర్టిస్టులను వెతకటానికి రీల్స్‌ మంచి వేదికగా మారుతోంది కూడా. దీన్ని దృష్టిలో పెట్టుకొనే కొత్తగా ‘1 మినిట్‌ మ్యూజిక్‌’ ఫీచర్‌ను ఆరంభించింది. ఇందులో ఇన్‌స్టాగ్రామ్‌కే ప్రత్యేకమైన తక్కువ నిడివి మ్యూజిక్‌ ట్రాక్స్, వీడియోలు దర్శనమిస్తాయి. దీంతో రీల్‌ మరింత జనరంజకంగా మారనుంది. వర్ధమాన కళాకారులు తమ సంగీతాన్ని షేర్‌ చేసుకోవటానికి, వీడియోలను సృష్టించుకోవటానికీ ఇది వీలు కల్పిస్తుంది. ఇతర కళాకారులు తమ స్వల్ప నిడివి ట్రాక్‌లను ఇందులో విడుదల చేసుకునేలా స్ఫూర్తిని ఇస్తుందని భావిస్తున్నారు. ‘1 మినిట్‌ మ్యూజిక్‌’ ఫీచర్‌లో వివిధ ప్రాంతాలకు చెందిన ధ్వని భానుశాలి, నీతి మోహన్‌ వంటి 200 మంది కళాకారుల ట్రాక్‌లు ఉన్నాయి.