షార్క్‌ చేపలే స్క్రబ్‌ బ్రష్షులైతే?

అపాయాన్ని ఉపాయంతో దాటటం చేపలకు బాగా తెలుసు. ఆ మాటకొస్తే అపాయాన్ని సైతం తమకు అనువుగానూ ఉపయోగించుకోగలవు. ఈ విషయాన్ని శాస్త్రవేత్తలు ఇటీవలే గుర్తించారు. తమను అమాంతం మింగేస్తాయని తెలిసినా కొన్ని రకాల చేపలు షార్క్‌ చేపలకు చాలా దగ్గరగా మసలుతున్నట్టు కనుగొన్నారు. శత్రువులకు అంత దగ్గరగా వెళ్లటమెందుకు? కోరి అపాయాన్ని కొని తెచ్చుకోవటమెందుకని అనుకుంటున్నారా? చేపలు అంత తెలివి తక్కువవేమీ కావు. ఇవి షార్క్‌లను స్క్రబ్‌ బ్రష్షులుగా వాడుకుంటున్నాయి మరి. షార్క్‌ చేపలకు తమ శరీరాన్ని రుద్దుతూ చికాకు పెట్టే పరాన్నజీవుల వంటి వాటిని వదిలించుకుంటున్నాయి. ఈ విషయం ఇంతకుముందే తెలిసినా ఏయే చేపలు, ఎక్కడెక్కడ, ఎంత తరచుగా ఇలాంటి సాహసానికి పూనుకుంటున్నాయో తెలుసుకోవాలని యూనివర్సిటీ ఆఫ్‌ మియామీ పరిశోధకులు అనుకున్నారు. డ్రోన్ల సాయంతో రంగంలోకి దిగి బోలెడంత సమాచారం సేకరించారు. దాదాపు 12 చేప జాతులు గ్రేట్‌ వైట్‌ షార్క్‌, సిల్కీ షార్క్‌ల గరుకు చర్మాన్ని స్క్రబ్‌ బ్రష్షులుగా ఉపయోగించుకుంటున్నట్టు తేల్చారు. పైగి ఇవి విడివిడిగా కాకుండా గుంపులుగా వచ్చి శరీరాన్ని శుభ్ర పరచుకోవటం విశేషం.