సీవో2ను గ్రహించే సూపర్‌కెపాసిటర్‌

బ్యాటరీ మాదిరిగా శక్తిని నిల్వ చేసుకుంటుంది. అదే సమయంలో చుట్టుపక్కల వాతావరణం నుంచి కార్బన్‌ డయాక్సైడ్‌ (సీవో2)ను గ్రహించు కుంటుంది. ఇలాంటి కొత్తరకం సూపర్‌ కెపాసిటర్‌ను యూనివర్సిటీ ఆఫ్‌ కేంబ్రిడ్జి పరిశోధకులు రూపొందించారు. రెండు నాణాలంత పెద్దగా ఉండే దీన్ని కొబ్బరి చిప్పలు, సముద్రపు నీరు వంటి సుస్థిర పదార్థాలతోనే తయారు చేయటం విశేషం. ఇందులో రెండు ధన, రుణ ఆవేశిత ఎలక్ట్రోడ్లు ఉంటాయి. ఛార్జింగ్‌ అయ్యే సమయాన్ని పెంచటం ద్వారా కార్బన్‌ డయాక్సైడ్‌ను మరింత ఎక్కువగా ఒడిసిపట్టేలా దీన్ని తీర్చిదిద్దారు. ఈ కార్బన్‌ డయాక్సైడ్‌ దీనిలోని సముద్రపు నీటిలో కరిగిపోతుంది. నేరుగా వాతావరణంలోంచి కాలుష్యాన్ని తొలగించే దిశగా కొత్త ఆశా కిరణంగా కనిపిస్తోంది. ఇది పూర్తిస్థాయిలో వాడకంలోకి రావటానికి ఇంకొంత కాలం వేచి చూడాల్సిందే.