Google best apps: ఈ ఏడాది గూగుల్‌ టాప్‌ యాప్స్‌ ఇవే..

ఇంటర్నెట్‌ డెస్క్‌: ప్రముఖ సెర్చింజిన్‌ గూగుల్‌.. ఈ ఏడాది ఉత్తమ యాప్స్‌ జాబితాను ప్రకటించింది. భారత్‌లో ఈ ఏడాది అత్యంత ప్రజాదరణ పొందిన మొబైల్‌ అప్లికేషన్ల జాబితాను వెలువరించింది. సాధారణ యాప్స్‌, గేమింగ్‌ యాప్స్‌ అందులో ఉన్నాయి. ఆయా యాప్‌ డెవలపర్లను ఇటీవల సత్కరించనుంది. 

• ఫ్లిప్‌కార్ట్‌కు చెందిన షాప్సీ (Shopsy) ఈ ఏడాది ఎక్కువ ఆదరణ పొందిన యాప్‌గా నిలిచింది. ఈ యాప్‌లో సెల్లర్ల వద్ద  కమీషన్‌ తీసుకోరు. ఎవరైనా సరే ఈ ఉత్పత్తులను తమ సోషల్‌ మీడియా ఖాతాల ద్వారా విక్రయించుకోవచ్చు. ఫ్యాషన్‌, మొబైల్‌, బ్యూటీ, ఫుట్‌వేర్‌ తదితర ఉత్పత్తులు ఇందులో లభిస్తాయి. ఉత్తమ రోజువారీ అవసరాలు తీర్చే యాప్‌ జాబితాలో ఈ యాప్‌కు అగ్రస్థానం లభించింది.

• విద్యార్థుల కోసం ఉద్దేశించిన క్వెస్ట్‌ (Questt) సైతం అత్యుత్తమ యాప్‌గా నిలిచింది. కృత్రిమ మేధ ద్వారా విద్యార్థుల అవసరాలను తెలుసుకుని అందుకనుగుణంగా అభ్యసనాలను అందిస్తుంది. అలాగే నేర్చుకునే క్రమంలో వారికి గేమింగ్‌ ఎక్స్‌పీరియన్స్‌ అందించడం ఈ యాప్‌ ప్రత్యేకత.

• బెస్ట్‌ యాప్స్‌ ఫర్‌ గుడ్‌ విభాగంలో సీనియర్‌ సిటిజన్ల కోసం ఉద్దేశించిన క్యాల్‌ (Khyaal) అగ్రస్థానంలో నిలిచింది. వృద్ధులకు ప్రీపెయిడ్‌ కార్డులు అందించడం, వారి అవసరాలకు సంబంధించిన ఉత్పత్తులపై డిస్కౌంట్లు అందించడం ఈ యాప్‌ ప్రత్యేకత.

• బెస్ట్‌ హిడెన్‌ జెమ్స్‌ విభాగంలో బేబీజీ (BabyG) యాప్‌ అగ్రస్థానంలో నిలిచింది. చిన్నారుల వృద్ధిని గుర్తించే ట్రాకర్‌ ఇది. చిన్నారుల తల్లిదండ్రులు తమ పిల్లల కార్యకలాపాలు తెలుసుకోవడంతో పాటు చిన్నారులకు కావాల్సిన స్టోరీలు ఇందులో అందుబాటులో ఉంటాయి.
• 2016లో విడుదలైన లూడో కింగ్‌ యాప్‌కు ఇప్పటికీ ప్రజాదరణ కొనసాగుతోంది. దీంతో ఆన్‌గోయింగ్‌ విభాగంలో లూడోకింగ్‌ను గూగుల్‌ సత్కరించింది. రియల్‌ క్రికెట్‌ 20ను సైతం ఇదే విభాగంలో గూగుల్‌ ఎంపిక చేసింది.