Instagram: ‘ఇన్‌స్టా’పోస్టులు డిలీట్‌ చేశారా?రికవరీ ఎలా మరీ..!

ఇంటర్నెట్‌ డెస్క్‌: ఉరకలెత్తే యువతరంతో ప్రముఖ సామాజిక మాధ్యమం ‘ఇన్‌స్టాగ్రామ్ (Instagram)‌’ దూసుకెళ్తోంది. తమ నవరస ప్రదర్శనకు యువత ‘ఇన్‌స్టా’ను వేదికగా ఎంచుకుంటున్నారు. పరిమిత నిడివి మేరకు వైవిధ్యంగా ‘రీల్స్‌’ చేస్తూ ఆకట్టుకుంటున్నారు. పోస్టులు, స్టోరీలతో చైతన్యం కలిగిస్తున్నారు. అందుకు తగ్గట్టే మెటా (ఫేస్‌బుక్‌) యాజమాన్యం టీనేజీని ఆకర్షించేలా ఎప్పటికప్పుడు కొత్త ఫీచర్లను అందుబాటులోకి తీసుకొస్తోంది. ఈ నేపథ్యంలో ఇన్‌స్టాలో మన డిలీట్‌ లేదా ఆర్కైవ్‌ చేసిన పోస్టులను మళ్లీ రికవరీ చేసుకోవడం ఎలానో మీకు తెలుసా? ఇందుకోసం మెటా ఓ ఫీచర్‌ను అందుబాటులోకి తీసుకొచ్చింది. డిలీట్‌ చేసిన పోస్టులను తిరిగి 30 రోజుల్లో రికవరీ చేసుకునేలా అవకాశం కల్పించింది. అదెలాగంటే..

① ఇందుకు ముందుగా మీరు మీ ఇన్‌స్టా పేజీలో ప్రొఫైల్‌ ఓపెన్‌ చేయండి. 

② ఆ తర్వాత ప్రొఫైల్‌కు కుడివైపు ఉన్న మెనూ (menu icon)పై క్లిక్‌ చేసి కింద ‘సెట్టింగ్స్‌ (Settings)’ లోకి వెళ్లండి.  

③ ఆపై సెట్టింగ్స్‌ మెనూలో ‘అకౌంట్‌ ఆప్షన్‌ (Account)’ను ఎంపిక చేసుకోండి. 

④ ఇందులో ‘రిసెంట్లీ డిలీటెడ్‌ (Recently Deleted)’ క్లిక్‌ చేయగానే ఇటీవల మీరు డిలీట్‌ చేసిన పోస్టుల జాబితా మీకు కనిపిస్తుంది.

⑤ ఇక్కడ మీరు ఏ పోస్టయితే రికవరీ చేయాలనుకుంటున్నారో దానిపై క్లిక్‌ చేయండి.

⑥ ఆపై పోస్టు పక్కనే ఉన్న (three-dot icon)పై క్లిక్‌ చేసి.. శాశ్వతంగా తొలగించాలనుకుంటే డిలీట్‌ కొట్టండి.

⑦ లేదంటే రికవరీ కోసం రీస్టోర్‌ (restore)పై క్లిక్‌ చేయండి.  

⑧ అనంతరం మొబైల్‌ నంబర్‌ లేదా ఈమెయిల్‌కు వచ్చిన ఓటీసీ నిర్ధారించుకొని పోస్టును రికవరీ చేసుకోండి.