SmartPhones: ఐకూ నుంచి ప్రీమియం 5జీ ఫోన్లు.. రియల్‌మీ నార్జో సిరీస్‌లో బడ్జెట్‌ ఫోన్‌!

ఇంటర్నెట్‌డెస్క్‌: భారత్‌లో 5జీ సేవలు అందుబాటులోకి రానుండటంతోపాటు, గేమింగ్‌ రంగానికి డిమాండ్ పెరుగుతుండటంతో మొబైల్‌ కంపెనీలు 5జీ, గేమింగ్‌కు అనుకూలమైన ఫీచర్లతో ఫోన్లను విడుదల చేస్తున్నాయి. కొత్తగా ఐకూ (iQoo) కంపెనీ 9 సిరీస్‌లో మూడు ఫోన్లను, రియల్‌మీ నార్జో (Realme Narzo)సిరీస్‌లో ఒక ఫోన్‌ను భారత మార్కెట్లోకి విడుదల చేశాయి. ఈ ఫోన్ల ధర, ఫీచర్లపై ఓ లుక్కేద్దామా మరి! 

ఐకూ 9 సిరీస్‌

ఐకూ కంపెనీ 9 సిరీస్‌లో ఐకూ 9 ప్రో 5జీ (iQoo 9 Pro 5G), ఐకూ 9 5జీ (iQoo 9 5G), ఐకూ 9 ఎస్‌ఈ 5జీ (iQoo 9 SE 5G) మోడల్స్‌ను విడుదల చేసింది. ఈ మూడు ఫోన్లు ఆండ్రాయిడ్ 12 ఆధారిత ఫన్‌టచ్‌ ఓఎస్‌ 12తో పనిచేస్తాయి. అమెజాన్‌, ఐకూ ఇండియా వెబ్‌సైట్ల ద్వారా ముందస్తు బుకింగ్స్‌ చేసుకోవచ్చు. గేమింగ్‌ ప్రియుల కోసం ప్రత్యేకంగా ఐకూ గేమింగ్‌ ప్యాడ్‌ను తీసుకొచ్చింది. గేమ్స్‌ ఆడేప్పుడు ఈ డివైజ్‌ను మొబైల్‌కు కనెక్ట్‌ చేసి గేమింగ్‌ను ఆస్వాదించవచ్చు. ఈ డివైజ్‌ను ఒక్కసారి ఛార్జ్‌ చేస్తే 150 గంటలపాటు నిరంతరాయంగా పనిచేస్తుంది. దీని ధర రూ. 2,999. దీంతోపాటు ఐకూ కంపెనీ 50 వాట్‌ వైర్‌లెస్ ఛార్జర్‌ను కూడా విడుదల చేసింది. దీని ధర రూ. 4,499.

ఐకూ 9 ప్రో 5జీ

ఈ ఫోన్‌లో 120 హెర్జ్‌ రిఫ్రెష్‌ రేట్‌, 300 హెర్జ్‌ టచ్‌ శాంప్లింగ్‌ రేట్‌తో 6.78 అంగుళాల 2K E5 అమోలెడ్ డిస్‌ప్లే ఇస్తున్నారు. దీనికి 3డీ కర్వ్‌డ్ గ్లాస్‌ ప్రొటెక్షన్‌ ఉంది. స్నాప్‌డ్రాగన్‌ 8 జనరేషన్‌ 1 5జీ ప్రాసెసర్‌ను ఉపయోగించారు. ఐకూ 9 ప్రో 5జీలో మొత్తం నాలుగు కెమెరాలున్నాయి. వెనుక మూడు, ముందు ఒక కెమెరా అమర్చారు. వెనుకవైపు కెమెరాల కోసం ప్రత్యేకమైన చతురస్రాకార డిజైన్‌ను ఇస్తున్నారు. ఇందులో శాంసంగ్‌ ఐసోసెల్‌ జీఎన్‌5 ప్రైమరీ సెన్సర్‌తో 50 ఎంపీ కెమెరాతోపాటు, 50 ఎంపీ వైడ్‌-యాంగిల్‌, 16 ఎంపీ పొట్రెయిట్‌ సెన్సర్‌ కెమెరాలున్నాయి. ముందు సెల్ఫీల కోసం 16 ఎంపీ కెమెరా ఉంది. 4,700 ఎంఏహెచ్‌ బ్యాటరీ, 120 వాట్‌ ఫ్లాష్‌ ఛార్జింగ్‌కు, 50 వాట్ వైర్‌లెస్‌ ఛార్జింగ్‌కు సపోర్ట్‌ చేస్తుంది. ఐకూ 9 ప్రో 5జీ రెండు వేరియంట్లలో అందుబాటులో ఉంది. 8 జీబీ ర్యామ్‌/256 జీబీ అంతర్గత మెమొరీ వేరియంట్‌ ధర రూ. 64,990. 12 జీబీ ర్యామ్‌/256 జీబీ ధర రూ. 69,990. 

ఐకూ 9 5జీ 

ఇందులో స్నాప్‌డ్రాగన్‌ 888+ 5జీ ప్రాసెసర్‌ను ఉపయోగించారు. 120 హెర్జ్‌ రిఫ్రెష్‌ రేట్, 300 టచ్‌ శాంప్లింగ్ రేట్‌తో 6.56 అంగుళాల ఫుల్‌ హెచ్‌డీ+ 10-బిట్ అమోలెడ్‌ డిస్‌ప్లే ఇస్తున్నారు. ఈ ఫోన్‌లో నాలుగు కెమెరాలున్నాయి. వెనుక 48 ఎంపీ ప్రైమరీ కెమెరాతోపాటు రెండు 13 ఎంపీ కెమెరాలు ఇస్తున్నారు. ముందు 16 ఎంపీ సెల్ఫీ కెమెరా అమర్చారు. 4,350 ఎంఏహెచ్‌ బ్యాటరీ ఉంది. ఇది 120 ఫ్లాష్‌ ఛార్జింగ్‌కు సపోర్ట్‌ చేస్తుంది. ఐకూ 9 5జీ రెండు వేరియంట్లలో లభిస్తుంది. 8 జీబీ ర్యామ్‌/ 128 జీబీ స్టోరేజ్‌ ధర రూ. 42,990. 12 జీబీ/256 జీబీ ధర రూ.46,990. 

ఐకూ 9 ఎస్‌ఈ 5జీ

120 హెర్జ్‌ రిఫ్రెష్‌ రేట్‌, 300 టచ్‌ శాంప్లింగ్‌తో 6.62 అంగుళాల ఫుల్‌హెచ్‌డీ+ అమోలెడ్ డిస్‌ప్లే ఇస్తున్నారు. స్నాప్‌డ్రాగన్‌ 888 5జీ ప్రాసెసర్‌ను ఉపయోగించారు. వెనుకవైపు 48 ఎంపీ ప్రైమరీ కెమెరాతోపాటు, 13 ఎంపీ వైడ్‌-యాంగిల్‌, 2 ఎంపీ మోనోక్రోమ్‌ కెమెరాలున్నాయి. ముందు 16 ఎంపీ  సెల్ఫీ కెమెరా ఉంది. 4,500 ఎంఏహెచ్‌ బ్యాటరీ ఇస్తున్నారు. ఇది 66 వాట్‌ ఫ్లాష్‌ ఛార్జ్‌ ఫాస్ట్‌ ఛార్జింగ్‌కు సపోర్ట్ చేస్తుంది. ఐకూ 9 ఎస్‌ఈ 5జీ రెండు వేరియంట్లలో లభిస్తుంది. 8 జీబీ ర్యామ్/ 128 జీబీ మెమొరీ వేరియంట్‌ ధర రూ. 33,990. 12 జీబీ/256 జీబీ ధర రూ. 37,990. 

రియల్‌మీ నార్జో 50 

ఈ ఫోన్ ఆండ్రాయిడ్ 11 ఆధారిత రియల్‌మీ యూఐ 2.0తో పనిచేస్తుంది. 120 హెర్జ్‌ రిఫ్రెష్‌ రేట్‌తో 6.6 అంగుళాల ఫుల్‌హెచ్‌డీ+ ఐపీఎస్‌ ఎల్‌సీడీ డిస్‌ప్లే ఇస్తున్నారు. మీడియాటెక్‌ హీలియో జీ96 ప్రాసెసర్‌ను ఉపయోగించారు. ర్యామ్‌ను పెంచుకునే ఫీచర్‌ ఉంది. రియల్‌మీ నార్జో 50లో నాలుగు కెమెరాలున్నాయి. వెనుక 50 ఎంపీ ప్రైమరీ కెమెరాతోపాటు రెండు 2 ఎంపీ కెమెరాలు ఇస్తున్నారు. ముందు 16 ఎంపీ సెల్ఫీ కెమెరా అమర్చారు. 5,000 ఎంఏహెచ్ బ్యాటరీ ఉంది. ఇది 33 వాట్‌ సూపర్‌డార్ట్‌ ఫాస్ట్‌ ఛార్జింగ్‌కు సపోర్ట్ చేస్తుంది. రియల్‌మీ నార్జో 50 రెండు వేరియంట్లలో లభిస్తుంది. 4 జీబీ ర్యామ్‌/64 జీబీ స్టోరేజ్‌ వేరియంట్‌ ధర రూ. 12,999. 6 జీబీ/128 జీబీ ధర రూ. 15,499. మార్చి 3 నుంచి రియల్‌మీ, అమెజాన్‌ వెబ్‌సైట్ల నుంచి కొనుగోలు చేయొచ్చు.