Oppo Reno 7 5G: ఒప్పో నుంచి రెనో సిరీస్‌లో కొత్త 5జీ ఫోన్లు

ఇంటర్నెట్‌డెస్క్‌: ఒప్పో కంపెనీ రెనో సిరీస్‌లో రెండు కొత్త 5జీ ఫోన్లను మార్కెట్లోకి విడుదల చేసింది. ఒప్పో రెనో 7 5జీ (Oppo Reno 7 5G), ఒప్పో రెనో 7 ప్రో 5జీ (Oppo Reno 7 Pro 5G) పేరుతో వీటిని తీసుకొచ్చింది. మిండ్‌-రేంజ్‌ శ్రేణిలో తీసుకొచ్చిన ఈ ఫోన్లలో ఎలాంటి పీచర్లున్నాయి.. వీటి ధరెంత? ఎప్పటి నుంచి అమ్మకాలు ప్రారంభంకానున్నాయనేది తెలుసుకుందాం.

ఈ రెండు ఫోన్లు ఆండ్రాయిడ్ 11 ఆధారిత కలర్‌ ఓఎస్‌ 12 ఓఎస్‌తో పనిచేస్తాయి. రెనో 7 5జీలో మీడియాటెక్ డైమెన్సిటీ 900 ప్రాసెసర్‌ను ఉపయోగించారు. 90 హెర్జ్‌ రిఫ్రెష్‌ రేట్‌తో 6.4 అంగుళాల ఫుల్‌ హెచ్‌డీ+ అమోలెడ్ డిస్‌ప్లే ఇస్తున్నారు. రెనో 7 ప్రో 5జీలో మీడియాటెక్ డైమెన్సిటీ 1200 మాక్స్‌ ప్రాసెసర్‌తో పనిచేస్తుంది. 90 హెర్జ్‌ రిఫ్రెష్‌ రేట్‌తో 6.5 అంగుళాల ఫుల్‌ హెచ్‌డీ+ అమోలెడ్‌ డిస్‌ప్లేను అమర్చారు. 

వీటిలో నాలుగు కెమెరాలున్నాయి. వెనుక మూడు, ముందు ఒక కెమెరా ఇస్తున్నారు. రెండు ఫోన్లలో 32 ఎంపీ సెల్ఫీ కెమెరా అమర్చారు. వెనుకవైపు రెనో 7 5జీలో 64 ఎంపీ ప్రధాన కెమెరాతోపాటు 8 ఎంపీ వైడ్‌ యాంగిల్‌, 2 ఎంపీ కెమెరాలు ఉన్నాయి. రెనో 7 ప్రో 5జీలో 50 ఎంపీ ప్రైమరీ, 8 ఎంపీ అల్ట్రా-వైడ్‌ యాంగిల్, 2 ఎంపీ కెమెరాలు ఇస్తున్నారు. వీటితోపాటు ఈ ఫోన్ కెమెరాలలో కలర్‌ టెంపరేచర్‌ సెన్సర్లను అమర్చారు.

రెండు ఫోన్లలో 4,500 ఎంఏహెచ్‌ బ్యాటరీ ఇస్తున్నారు. ఇది 65 వాట్‌ సూపర్‌వోక్ ఫాస్ట్‌ ఛార్జింగ్‌కు సపోర్టు చేస్తుంది. రెనో 7 5జీ 8 జీబీ ర్యామ్‌/256 జీబీ ఇంటర్నల్‌ స్టోరేజ్‌ వేరియంట్‌లో లభిస్తుంది. దీని ధర రూ.28,999. ఫిబ్రవరి 17 నుంచి అమ్మకాలు ప్రారంభంకానున్నాయి. రెనో 7 ప్రో 5జ3 12 జీబీ/256 జీబీ వేరియంట్‌ ధర రూ.39,999. ఫిబ్రవరి 8 నుంచి కొనుగోలు చేయొచ్చు.