5G SmartPhone: 5జీ ఫోన్ కొంటున్నారా..? ఈ మూడు విషయాలు గుర్తుంచుకోండి!

దేశంలో 5జీ సేవలు ప్రారంభమయ్యాయి. మొబైల్ కంపెనీలు రెండేళ్ల  క్రితం నుంచే 5జీ ఫోన్లలను విడుదల చేస్తున్నాయి. ఈ నేపథ్యంలో 5జీ ఫోన్ కొనేముందు ఏయే అంశాలు పరిగణలోకి తీసుకోవాలో తెలుసుకుందాం...

Updated : 04 Oct 2022 13:52 IST

ఇంటర్నెట్‌ డెస్క్‌: సినిమా డౌన్‌లోడ్ కోసం ఎదురుచూపులు ఉండవు.. వీడియో కాల్స్‌ పూర్‌ కనెక్షన్‌ అని చూపించవు.. మొబైల్‌ గేమింగ్‌లో బఫరింగ్‌ ఉండదు. వీటని వేగంగా, అంతరాయం లేకుండా అందించే 5జీ టెలికాం నెట్‌వర్క్ ఎట్టకేలకు దేశంలో అందుబాటులోకి వచ్చేసింది. 5జీ రాకతో సాంకేతిక రంగంలో విప్లవాత్మకమైన మార్పులు చోటుచేసుకుంటాయని టెక్ నిపుణులు చెబుతున్నారు. ముందుగా ప్రధాన నగరాల్లో, తర్వాత దేశవ్యాప్తంగా పట్టణ, గ్రామీణ ప్రాంతాలకు 5జీ సేవలను విస్తరిస్తామని మొబైల్ నెట్‌వర్క్‌ సంస్థలు ప్రకటించాయి. ఫోన్‌ తయారీ కంపెనీలు రెండేళ్ల క్రితం నుంచే 5జీ ఫోన్లను మార్కెట్లోకి విడుదల చేస్తుండటంతో ఎన్నో రకాల మోడల్స్‌ అందుబాటులో ఉన్నాయి. వాటిలోంచి మన అవసరాలకు తగిన మోడల్‌ను ఎలా ఎంచుకోవాలి? 5జీ ఫోన్‌ కొనేముందు ఏయే అంశాలు దృష్టిలో పెట్టుకోవాలనేది చూద్దాం...


చిప్‌సెట్‌ కీలకం

ఫోన్ 5జీ నెట్‌వర్క్‌ను సపోర్ట్ చేయాలంటే అందులో 5జీ ప్రాసెసర్‌ ఉండాల్సిందే. మార్కెట్లో విడుదలైన 5జీ ఫోన్లలో మిడ్‌-రేంజ్‌, ఫ్లాగ్‌షిప్‌ మోడల్స్‌లో 5జీ ప్రాసెసర్‌నే ఉపయోగిస్తున్నాయి. వీటిలో కొన్ని ఫోన్లలో క్వాల్‌కోమ్‌ ప్రాసెసర్లు ఉపయోగిస్తుంటే, మరికొన్ని ఫోన్లలో మీడియాటెక్ ప్రాసెసర్లను వాడుతున్నారు. స్నాప్‌డ్రాగన్‌ 695, 765జీ, 865 ఆపై మోడల్స్‌ 5జీని సపోర్ట్ చేస్తాయి. మీడియాటెక్ డైమెన్సిటీ సిరీస్‌లో 700, 8100, 9,000తోపాటు జీ, హీలియో సిరీస్‌ ప్రాసెసర్లు 5జీ నెట్‌వర్క్‌ను సపోర్ట్ చేస్తాయి. ఫోన్‌ కొనేముందు 5జీ ప్రాసెసర్‌ అవునా? కాదా? అనేది తప్పనిసరిగా సరిచూసుకోవాలి.


 

బ్యాండ్స్‌ మాటేంటి!

ప్రాసెసర్‌ తర్వాత 5జీ మొబైల్‌లో ముఖ్యమైన ఫీచర్‌ బ్యాండ్స్‌. మీరు కొంటున్న ఫోన్ ఎన్ని రకాల 5జీ బ్యాండ్స్‌ను సపోర్ట్ చేస్తుందో తెలుసుకోవాలి. కనీసం ఎనిమిది నుంచి 12 రకాల బ్యాండ్స్‌ను సపోర్ట్ చేస్తున్నట్లయితే మీరు ఎంచుకున్న మోడల్‌ సరైనదే. ఒకవేళ మీరు కొంటున్న ఫోన్‌ రెండు లేదా మూడు 5జీ బ్యాండ్స్‌ను మాత్రమే సపోర్ట్ చేస్తుంటే, దాన్ని కొనకపోవడమే ఉత్తమం. నెట్‌వర్క్‌ ప్రొవైడర్‌ కంపెనీలు వేర్వేను బ్యాండ్‌విడ్త్‌లతో 5జీ సేవలను అందిస్తున్నాయి. భవిష్యత్తులో ఈ బ్యాండ్‌విడ్త్స్‌లో మార్పులు జరిగే అవకాశం లేకపోలేదు. ఈ నేపథ్యంలో కేవలం రెండు లేదా మూడు బ్యాండ్‌విడ్త్‌లను సపోర్ట్ చేసే ఫోన్‌ను కొనుగోలు చేస్తే, దాంతో ఎక్కువకాలం 5జీ సేవలు పొందలేకపోవచ్చు.


అప్‌డేట్స్‌ వస్తాయా..?

ఎలాంటి సాంకేతికతకైనా ప్రారంభంలో కొన్ని లోటుపాట్లు ఉంటాయి. వాటిని సరిచేస్తూ ఆయా కంపెనీలు అప్‌డేట్‌లను విడుదల చేస్తుంటాయి. 5జీ నెట్‌వర్క్‌కు సైతం ఇది వర్తిస్తుంది. ముందుగా సర్వీస్‌ ప్రొవైడర్లు విడుదల చేసే 5జీ నెట్‌వర్క్‌కు సంబంధించిన అప్‌డేట్‌లను ఓవర్‌-ది-ఎయిర్ (OTA) పంపుతారు. వీటిని సపోర్ట్ చేసేందుకు మీరు కొనుగోలు చేస్తున్న మొబైల్ కంపెనీ కూడా ఎప్పటికప్పుడు ఓఎస్‌ అప్‌డేట్‌లను విడుదల చేస్తుండాలి. కాబట్టి, మీరు కొంటున్న ఫోన్‌ కంపెనీ ఓఎస్‌ను తరచుగా అప్‌డేట్‌ చేస్తుందా? లేదా? అని చెక్‌ చేయాలి. ఒకవేళ అప్‌డేట్స్‌ సరిగా రాకుంటే ఆ ఫోన్‌ను కొనకపోవడమే మేలు. 

Read latest Technology News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని