Twitter: ఒకేసారి మరింత రాసేలా.. కొత్త ఫీచర్‌ను పరీక్షిస్తున్న ట్విటర్‌!

ఇంటర్నెట్‌ డెస్క్‌: వినియోగదారుల కోసం ట్విటర్‌(Twitter) మరో కొత్త ఫీచర్‌ను అందుబాటులోకి తీసుకురానుంది! యూజర్లు చెప్పాలనుకున్న విషయాన్ని ఒక్కో ట్వీట్‌ (Tweet)కు 280 అక్షరాలు చొప్పున పరిమితం చేయకుండా.. బ్లాగ్‌ రూపంలో అంతా ఒకేదాంట్లో రాసేందుకు వీలు కల్పించనున్నట్లు సమాచారం. ఈ మేరకు ‘నోట్స్‌(Notes)’ అనే ఫీచర్‌ను పరీక్షిస్తున్నట్లు తాజాగా వెల్లడించింది. ఇందులో గరిష్ఠంగా 2500 అక్షరాల వరకు రాసుకునే అవకాశం ఉంది. బ్లాగ్‌ మాదిరిగా ఇందులో ఫొటోలు, వీడియోలు, జిఫ్‌లు, ఎంబెడెడ్‌ ట్వీట్‌లను అటాచ్‌ చేయొచ్చని తెలిపింది.

ఈ ఫీచర్‌ అందుబాటులోకి వస్తే యూజర్‌ సైడ్‌బార్‌లో మెసేజెస్‌, బుక్‌మార్క్స్‌ మధ్యలో ‘రైట్‌(Write)’ అనే ఆప్షన్‌ కనిపిస్తుంది. దానిపై క్లిక్‌ చేసి టైటిల్‌, హెడర్‌ ఫొటో పెట్టి.. చెప్పాలనుకున్న విషయాన్ని టైప్‌ చేయాలి. టైటిల్‌ ప్రివ్యూతో ఈ ‘నోట్స్‌’ వినియోగదారుల టైమ్‌లైన్‌పై ట్వీట్‌ రూపంలో కనిపిస్తుంది. దానిపై క్లిక్‌ చేస్తే.. ప్రత్యేక లింక్‌తో నోట్స్‌ ఓపెన్‌ అవుతుంది. ప్రస్తుతం అమెరికా, బ్రిటన్‌, కెనడా, ఘనా దేశాలకు చెందిన రచయితలతో ట్విటర్‌.. ఈ ఫీచర్‌కు సంబంధించి పబ్లిక్ టెస్ట్‌ ప్రారంభించింది.

‘కొద్దిమంది రచయితల బృందంతో క్లోజ్డ్ టెస్ట్‌ నిర్వహిస్తున్నాం. తద్వారా ఈ ఫీచర్‌ను వినియోగించేవారికి ఏ విధంగా ఉత్తమమైన సేవలు అందించవచ్చో తెలుస్తుంది’ అని సంస్థ తెలిపింది. ప్రస్తుతం ఈ మైక్రో-బ్లాగింగ్ సైట్‌లోని ఒక ట్వీట్‌లో గరిష్ఠంగా 280 క్యారెక్టర్స్‌ వరకు రాసుకొనే వీలుంది. ఆపై రాయాలనుకుంటే.. మరో ట్వీట్‌ను దానికి జోడించాల్సిందే. సమాచారం ఎక్కువగా ఉంటే.. పదుల కొద్ది ట్వీట్‌లు వరుస కడతాయి. ఈ సమస్యను పరిష్కరించి వినియోగదారుల సౌలభ్యం కోసం ట్విటర్‌ కొత్త ఫీచర్‌తో ముందుకొచ్చేందుకు కసరత్తు చేస్తోంది.