Whatsapp డెడ్‌లైన్‌.. యూజర్లకు ఊరట

దిల్లీ: వాట్సాప్‌ వినియోగదారులకు ఊరట. గడువు ముగిసినప్పటికీ నూతన ప్రైవసీ పాలసీని అంగీకరించకపోయిన వారి ఖాతాలు డిలీట్‌ చేయబోమని వాట్సాప్‌ స్పష్టంచేసింది. ఇందుకోసం విధించిన మే 15 డెడ్‌లైన్ విషయంలో వెనక్కి తగ్గింది. ఆ గడువు దాటినప్పటికీ నూతన ప్రైవసీ పాలసీని అంగీకరించకపోయిన ఖాతాలు కొనసాగుతాయని వాట్సాప్‌ ప్రతినిధి ఒకరు తెలిపారు.

అలాగే, ప్రైవసీ పాలసీని ఆమోదించాలన్న రిమైండర్లను మరికొన్ని వారాల పాటు యూజర్లకు పంపిస్తామని వాట్సాప్‌ ప్రతినిధి చెప్పారు. ఇప్పటి వరకూ అలా సందేశాలు వచ్చిన వారిలో చాలా మంది ప్రైవసీ పాలసీని ఆమోదించారని తెలిపారు. అయితే, ఎంత మంది నూతన పాలసీని ఆమోదించారనే అంశంపై స్పష్టతనివ్వలేదు. అలాగే, వాట్సాప్‌ తాజా నిర్ణయం వెనుక అసలు కారణం మాత్రం తెలియరాలేదు.