గుండెపోటు వస్తే ఇలా ప్రాణం కాపాడొచ్చు.. రాజమౌళితో సీపీఆర్‌ అవగాహన

కేపీహెచ్‌బీకాలనీ, న్యూస్‌టుడే: కన్నడ నటుడు పునీత్‌ రాజ్‌కుమార్‌, ఏపీ మంత్రి మేకపాటి గౌతమ్‌రెడ్డి గుండెపోటుతో హఠాన్మరణం చెందిన విషయం విదితమే. ఈనేపథ్యంలో గుండెపోటు వస్తే ఎలా అప్రమత్తమవ్వాలి.. వెంటనే ఎలాంటి జాగ్రత్తలు తీసుకుంటే ప్రాణాలు కాపాడుకోవచ్చో తెలిపే వీడియోను తీయాలనుకున్నారు నగరానికి చెందిన ప్రముఖ కార్డియాలజిస్ట్‌ ఎంఎస్‌ఎస్‌ ముఖర్జీ. అనుకున్నదే తడవుగా ఎవరైనా ప్రముఖ వ్యక్తితో తీస్తే అందరికీ చేరుతుందనే ఆలోచనతో దర్శక దిగ్గజం రాజమౌళిని సంప్రదించగా ఆయన ఒప్పుకొన్నారు. గుండెపోటుతో ఎవరైనా కుప్పకూలిపోతే తొలి 3 నిమిషాల్లో అప్రమత్తమైతే ప్రాణం కాపాడొచ్చని ఆయన అంటున్నారు. బీఎల్‌ఎస్‌ (బేసిక్‌ లైఫ్‌ సపోర్ట్‌) పద్ధతిలో రాజమౌళితో స్వయంగా సీపీఆర్‌ (కార్డియా పల్మనరీ రీసఫిటేషన్‌) ప్రక్రియ చేసేలా అవగాహన కల్పించారు. రోగిని వెల్లికిలా పడుకోబెట్టి గట్టిగా కదపాలి. పక్కన ఉన్నవారికి 108కి ఫోన్‌ చేయాలని పురమాయించాలి. శ్వాస, పల్స్‌ తనిఖీ చేయడంతోపాటు రెండు చేతులతో ఛాతీపై గట్టిగా వత్తుతూ ఉండాలి. తలను కొంచెం పైకి లేపి నోట్లో నోరు పెట్టి గాలి ఊదితే ఫలితం ఉంటుందన్నారు. ఈలోపు ఏఈడీ యంత్రం అందుబాటులో ఉంటే వారి ఛాతీపై ఉంచి షాక్‌ ఇవ్వాలన్నారు. ఇలాంటి ప్రక్రియలను వెంటవెంటనే తొలి 3 నిమిషాల్లో చేపడితే ప్రాణం కాపాడొచ్చన్నారు.