Ts News: సికింద్రాబాద్ క్లబ్‌ అగ్ని ప్రమాద ఘటన.. కొనసాగుతోన్న దర్యాప్తు

హైదరాబాద్‌: సికింద్రాబాద్ క్లబ్‌లో జరిగిన అగ్ని ప్రమాద ఘటనపై దర్యాప్తు కొనసాగుతోంది. మహంకాళీ ఏసీపీ రమేశ్ ఆధ్వర్యంలో ఈ కేసు దర్యాప్తు కొనసాగుతోంది. అగ్ని ప్రమాదం ఎలా జరిగిందనే విషయం తేల్చాలని అగ్నిమాపక శాఖ, విద్యుత్ శాఖలకు పోలీసులు లేఖలు రాశారు. వాళ్ల నుంచి నివేదిక వచ్చిన తర్వాత... ఆ అంశాలను పరిశీలించి దర్యాప్తు కొనసాగించనున్నారు. ఆదివారం తెల్లవారుజామున చోటుచేసుకున్న అగ్ని ప్రమాదంలో సికింద్రాబాద్ క్లబ్ పూర్తిగా కాలిపోయింది. లోపల ఉన్న పురాతన వస్తువలు, ఖరీదైన ఫర్నిచర్‌తో పాటు విదేశీ మద్యం కూడా అగ్నికి ఆహుతైంది. ఈ ప్రమాదంలో దాదాపు రూ.25 కోట్ల విలువైన ఆస్తి నష్టం వాటిల్లినట్లు క్లబ్ సభ్యులు పోలీసులకు తెలిపారు. ఆ తర్వాత ప్రతి వస్తువు విలువను ప్రాథమికంగా అంచనా వేసి రూ. 15 కోట్ల వరకు నష్టం సంభవించి ఉండొచ్చని పోలీసులు భావిస్తున్నారు. క్లబ్‌లో మద్యానికి సంబంధించిన వివరాలను ఆబ్కారీ శాఖ నుంచి పోలీసులు సేకరించే పనిలో పడ్డారు.