TS high court: దళితబంధు నిలిపివేతపై హైకోర్టు తీర్పు రిజర్వ్‌

హైదరాబాద్‌: హుజూరాబాద్‌లో దళితబంధు పథకం నిలిపివేతపై హైకోర్టులో దాఖలైన పిటిషన్లు ఇవాళ విచారణకు వచ్చాయి. సీజే జస్టిస్‌ సతీష్‌ చంద్ర శర్మ, జస్టిస్‌ రాజశేఖర్‌రెడ్డిల ధర్మాసనం విచారణ జరిపింది. పథకం నిలిపివేతపై దాఖలైన మూడు ప్రయోజన వ్యాజ్యాలకు సంబంధించి వాదనలు ముగియడంతో ఉన్నత న్యాయస్థానం తీర్పును రిజర్వ్‌ చేసింది. మల్లేపల్లి లక్ష్మయ్య, జడ్సన్‌, వాచ్‌ వాయిస్‌ ఆఫ్‌ పీపుల్స్‌ సంస్థ.. దళితబంధు పథకం నిలిపివేతపై హైకోర్టులో వ్యాజ్యాలు దాఖలు చేశారు. పథకం నిలిపి వేయాలన్న ఈసీ ఉత్తర్వులు రద్దు చేయాలని లక్ష్మయ్య, జడ్సన్ ఉన్నత న్యాయస్థానాన్ని కోరారు. మరోవైపు ప్రత్యక్ష లబ్ధి బదిలీ పథకాలను ఉప ఎన్నిక అయ్యే వరకు నిలిపి వేయాలని వాచ్‌ వాయిస్‌ ఆఫ్‌ పీపుల్స్‌ సంస్థ కోరింది. ఈ మేరకు వాదనలు విన్న ధర్మాసనం తీర్పు రిజర్వ్‌ చేసింది.