Telangana Highcourt: కేంద్ర, రాష్ట్ర ప్రభుత్వాలు చేతులు దులిపేసుకున్నాయి: హైకోర్టు

హైదరాబాద్: గత ఏడాది వరదల్లో నష్టపోయిన రైతులకు పరిహారం చెల్లించే విషయంలో కేంద్ర, రాష్ట్ర ప్రభుత్వాలు చేతులు దులిపేసుకున్నాయని హైకోర్టు వ్యాఖ్యానించింది. వరదల్లో నష్టపోయిన రైతులకు పరిహారం చెల్లింపుపై దాఖలైన పిటిషన్‌పై హైకోర్టులో విచారణ జరిగింది. కేంద్ర, రాష్ట్ర ప్రభుత్వాల తీరుపై ఉన్నత న్యాయస్థానం తీవ్ర అసహనం వ్యక్తం చేసింది. వరద సాయం తమ పరిధిలోకి రాదని కేంద్ర వ్యవసాయశాఖ వెల్లడించడంపై అసంతృప్తి వ్యక్తం చేసింది. కౌంటర్‌ దాఖలుకు జాప్యం ఎందుకని కేంద్ర హోంశాఖను హైకోర్టు ప్రశ్నించింది. ఇవాళ్టి విచారణకు అడ్వొకేట్‌ జనరల్‌ ఎందుకు హాజరుకాలేదని ఆగ్రహం వ్యక్తం చేసింది. తదుపరి విచారణకు ఏజీ తప్పనిసరిగా హాజరుకావాలని ఆదేశించిన హైకోర్టు.. విచారణను ఈ నెల 8కి వాయిదా వేసింది.