TS News: పొరపాట్లు సవరించి.. ఉత్తర్వులు జారీ చేయండి: టీఎన్జీవో నేతలు

హైదరాబాద్‌: ఉద్యోగుల విభజన, కేటాయింపుల ప్రక్రియలో పరస్పర బదిలీలు, భార్యాభర్తల కేసులకు అవకాశం ఇచ్చిన బదిలీలు చేపట్టాలని టీఎన్జీవో సంఘం రాష్ట్ర ప్రభుత్వాన్ని కోరింది. ఈమేరకు టీఎన్జీవో నేతలు సచివాలయంలో సీఎస్‌ సోమేశ్‌ కుమార్‌ను కలిసి వినతిపత్రం అందించారు. ఉద్యోగులకు 3 డీఏ బకాయిలు చెల్లించేందుకు అనుమతించిన సీఎం కేసీఆర్‌కు వారు కృతజ్ఞతలు తెలిపారు. ఉద్యోగుల విభజనలో భార్యాభర్తల కేసులు, పరస్పర బదిలీల కేసులు, సీనియారిటీలో జరిగిన పొరపాట్లను సవరించడంతో పాటు అప్పీళ్లను పరిష్కరించాలని విజ్ఞప్తి చేశారు. ఈమేరకు ఉద్యోగులకు వెసులుబాటు కల్పిస్తూ ఉత్తర్వులు జారీ చేయాలని సీఎస్‌ను కోరారు. త్వరలోనే ముఖ్యమంత్రి దృష్టికి తీసుకెళ్లి ఉత్తర్వులు జారీ చేస్తామని సీఎస్‌ హామీ ఇచ్చినట్టు నేతలు తెలిపారు. రేపు ఉత్తర్వులు జారీ అయ్యే అవకాశముందని చెప్పారు.