హెలికాప్టర్‌ ప్రమాదం విద్రోహ చర్య కాదు

కోర్ట్‌ ఆఫ్‌ ఎంక్వైరీలో ప్రాథమికంగా నిర్ధారణ

దిల్లీ: భారత తొలి త్రిదళాధిపతి జనరల్‌ బిపిన్‌ రావత్‌ సహా మొత్తం 14 మంది దుర్మరణం పాలైన హెలికాప్టర్‌ ప్రమాదం వెనుక కుట్ర కోణం ఏదీ లేదని త్రివిధ దళాల కోర్ట్‌ ఆఫ్‌ ఎంక్వైరీ ప్రాథమికంగా నిర్ధారించింది. గతేడాది డిసెంబరు 8న చోటుచేసుకున్న ఆ దుర్ఘటన.. విద్రోహ చర్య కాదని తేల్చింది. ఈ మేరకు వాయుసేనకు తాజాగా నివేదికను సమర్పించింది. మెకానికల్‌ వైఫల్యం, నిర్లక్ష్యం కూడా ప్రమాదానికి కారణాలు కావని అందులో పేర్కొంది. వాతావరణం ఆకస్మికంగా మారడంతో పైలట్‌ నియంత్రణ కోల్పోయారని వెల్లడించింది.