విద్యాసంస్థలకు సెలవులు 30 వరకు పొడిగింపు

వైద్యకళాశాలలకు మినహాయింపు

ఈనాడు, హైదరాబాద్‌: రాష్ట్రంలో వైద్యకళాశాలలు మినహా అన్ని ప్రభుత్వ, ఎయిడెడ్‌, ప్రైవేటు పాఠశాలలు, కళాశాలలు, విద్యాసంస్థల సెలవులు పొడిగిస్తూ ప్రభుత్వం ఆదివారం ఉత్తర్వులు (జీవో నం.4) జారీ చేసింది. రాష్ట్రంలో కరోనా కేసులు పెరుగుతున్నందున సీఎం కేసీఆర్‌ నిర్ణయం మేరకు ఈ ఉత్తర్వులు ఇచ్చినట్లు సీఎస్‌ సోమేశ్‌కుమార్‌ తెలిపారు. ఈ నెల తొలి వారంలోనే కేసుల సంఖ్య గణనీయంగా పెరగడంతో 8 నుంచి 16 వరకు సంక్రాంతి సెలవులను ప్రభుత్వం ప్రకటించిన విషయం విదితమే. ఆదివారంతో ఈ గడువు ముగిసింది. అయితే రాష్ట్రంలో ఇంకా కరోనా కేసుల సంఖ్య పెరుగుతుండటంతో కొంతకాలం ప్రత్యక్ష తరగతులు నిర్వహించరాదని వైద్యఆరోగ్యశాఖ సిఫార్సు చేయగా ప్రభుత్వం ఈ నిర్ణయం తీసుకుంది.