గోనె సంచుల లెక్క.. పక్కా

ఈనాడు డిజిటల్‌, సిద్దిపేట: ప్రతి సీజన్‌లో పెరుగుతున్న ధాన్యం దిగుబడుల దృష్ట్యా రాష్ట్రవ్యాప్తంగా గోనె సంచుల వినియోగం అదే స్థాయిలో ఉంటోంది. ఇందులో అక్రమాల నివారణకు పౌర సరఫరాల శాఖ క్యూఆర్‌ కోడ్‌ విధానాన్ని ప్రయోగాత్మకంగా తెరపైకి తెచ్చింది. ఇప్పటికే సిద్దిపేటలోని ఓ రైస్‌మిల్లులో పరిశీలన ప్రారంభమవగా.. జనగామ జిల్లాలోని కొడకండ్లలో త్వరలోనే ప్రారంభించనున్నట్లు అధికారులు తెలిపారు. ప్రస్తుతం సిద్దిపేట జిల్లా కేంద్రంలోని సరస్వతీ రైస్‌మిల్లులో 10 వేల గోనె సంచులకు అధికారులు క్యూఆర్‌ కోడ్‌ ఏర్పాటు చేశారు. వివిధ దశల్లో ధాన్యం, బియ్యం సంచులను ట్రాక్‌ చేసేందుకు వీలుగా స్కానర్లను అమర్చనున్నారు. దీని ద్వారా ధాన్యం, బియ్యం లెక్కలను ఎప్పటికప్పుడు అంచనా వేయవచ్చని అధికారులు చెబుతున్నారు.