Omicron: ఒమిక్రాన్‌పై ఆందోళన వద్దు

కొవాగ్జిన్‌ తరహా టీకాలతో మెరుగైన ఫలితాలు
ఇంకా ఇది నిర్ధారణ కావాల్సి ఉంది
ఇతర టీకాలు స్పైక్‌ ప్రొటీన్‌ లక్ష్యంగా తయారైనవి
ముప్పు ఉన్నవారికి మొదట బూస్టర్‌ డోసు ఇవ్వాలి
‘ఈనాడు’తో ముఖాముఖిలో డాక్టర్‌ శ్రీనాథరెడ్డి వెల్లడి
అయితరాజు రంగారావు
ఈనాడు - హైదరాబాద్‌

‘‘ఒమిక్రాన్‌ నమోదైన అన్ని దేశాల్లో కేసులను పరిశీలిస్తే.. అన్నీ కూడా స్వల్ప లక్షణాలతో కూడినవే. వైరస్‌ స్వభావం మారుతుంటే.. ఒక విధంగా బలహీనపడుతున్నట్లు అనిపిస్తోంది’’ అని భారతీయ ప్రజారోగ్య సంస్థ అధ్యక్షులు, ప్రఖ్యాత గుండె వ్యాధుల నిపుణులు డాక్టర్‌ శ్రీనాథరెడ్డి అభిప్రాయపడ్డారు. అయితే ఇది నిర్ధారణ కావాలంటే మరికొంత కాలం వేచి చూడాల్సి ఉంటుందన్నారు. కొత్త వేరియంట్‌పై అంత భయాందోళనలు చెందాల్సిన అవసరం లేదన్నారు. అయితే దీనివల్ల ఇన్‌ఫెక్షన్‌ బారినపడే వారి సంఖ్య పెరుగుతుందని తెలిపారు. వ్యాక్సిన్ల ప్రభావమూ కొంతవరకు తగ్గుతోందన్నారు. ప్రపంచ దేశాలను కలవరపెడుతున్న ఒమిక్రాన్‌ వేరియంట్‌ను ఎదుర్కొనే అవకాశం కొవాగ్జిన్‌ తరహా టీకాలకు ఉందని ఆయన చెప్పారు. ఒమిక్రాన్‌కు వ్యతిరేకంగా ఈ తరహా టీకాలు మెరుగైన రక్షణ కల్పించే అవకాశాలున్నాయని ఆయన అభిప్రాయపడ్డారు. దీర్ఘకాలిక అనారోగ్య సమస్యలతో బాధపడుతున్నవారు, ఇతర కారణాలతో ముప్పు పొంచి ఉన్నవారికి బూస్టర్‌ డోసు ఇవ్వాల్సిన అవసరముందని ఆయన స్పష్టం చేశారు. భారత్‌లోకి ఒమిక్రాన్‌ వేరియంట్‌ ప్రవేశించిన నేపథ్యంలో.. ‘ఈనాడు’తో ముఖాముఖిలో డాక్టర్‌ శ్రీనాథరెడ్డి పలు అంశాలను వెల్లడించారు.

ఒమిక్రాన్‌.. కొత్త వేరియంట్‌ వచ్చేసింది. దీనిపై ప్రస్తుతమున్న టీకాలు పనిచేస్తాయా అనే సందేహాలున్నాయి?
టీకాల పనితీరు గురించి చర్చించడానికి ముందు.. వైరస్‌, టీకాల తయారీ గురించి తెలుసుకోవాలి. కరోనా వైరస్‌ ఎప్పటికప్పుడూ అతి వేగంగా ఉత్పరివర్తనాలు చెందుతోంది. ప్రపంచ వ్యాప్తంగా ప్రస్తుతం వినియోగిస్తున్న అత్యధిక వ్యాక్సిన్లు ఎక్కువగా ‘స్పైక్‌ ప్రొటీన్ల’పై కేంద్రీకృతమై రూపొందించినవే. వీటిలో కరోనా వైరస్‌లోని ‘స్పైక్‌ ప్రొటీన్‌’ జన్యుక్రమాన్ని విడదీస్తారు. వెలుపలికి తీసిన ‘స్పైక్‌ ప్రొటీన్‌’ను ‘ఎడినో వైరస్‌’తో సమ్మిళితం చేస్తారు. ఎడినో వైరస్‌ ఒక వాహకంగా ఉపయోగపడుతుంది. ఇది శరీరంలోకి వెళ్లినా ఎటువంటి హాని కలగజేయదు. ‘స్పైక్‌ ప్రొటీన్‌ శరీరంలోకి వెళ్లగానే శరీరంలోని రోగ నిరోధక వ్యవస్థ దాన్ని గుర్తించి దానిని ఎదుర్కొవడానికి వీలుగా యాంటీబాడీస్‌ను ఉత్పత్తి చేస్తుంది. మళ్లీ తర్వాత ఎప్పుడైనా ఈ స్పైక్‌ ప్రొటీన్‌ ప్రవేశించినా.. శరీరం అందుకగుణంగా రోగ నిరోధక శక్తిని ఉత్పత్తి చేస్తుంది.

కొవాగ్జిన్‌ తరహా టీకాలను నిర్జీవ కరోనా వైరస్‌ (ఇనాక్టివేటెడ్‌ వైరస్‌)తో తయారుచేస్తారు. ఇవి స్పైక్‌ ప్రొటీన్‌తో పాటు వైరస్‌లోని ఇతర భాగాలపైనా ప్రభావం చూపుతాయి. వైరస్‌లో స్పైక్‌ ప్రొటీన్‌ అనేది ఒక భాగం మాత్రమే. ఆ పదార్థం వచ్చి మన శరీరంలోని కణాలకు అతుక్కుపోతుంది. వైరస్‌ శరీరంలోకి ప్రవేశించడానికి అది మార్గం లాంటిది. సాధారణ భాషలో చెప్పాలంటే కరోనా వైరస్‌కు స్పైక్‌ ప్రొటీన్‌ తల లాంటిది. అయితే వైరస్‌కు ఇతర భాగాలు కూడా ఉంటాయి. ఇ ప్రొటీన్‌, ఎన్‌ ప్రొటీన్‌, ఓఆర్‌ఎఫ్‌ జన్యువు వంటివి ఉంటాయి. కొవాగ్జిన్‌ తరహా టీకాలు స్పైక్‌ ప్రొటీన్‌తో పాటు వైరస్‌లోని ఇతర భాగాలను కూడా లక్ష్యంగా చేసుకొని ఛేదిస్తాయి. ఒకవేళ వైరస్‌ ఉత్పరివర్తనం వల్ల స్పైక్‌ ప్రొటీన్‌లో మార్పులు వచ్చి సమర్థంగా ఎదుర్కోలేకపోయినా.. ఇతర భాగాలపైనా సమర్థంగా పనిచేసి రక్షణ కల్పిస్తుంది. అందువల్ల స్పైక్‌ ప్రొటీన్‌ ఆధారిత టీకాల కంటే.. ఇనాక్టివేటెడ్‌ టీకాలు ఒమిక్రాన్‌పైనా సమర్థంగా పనిచేసే అవకాశాలున్నాయి.

దీనిపై అధ్యయనాలు జరిగాయా?
స్పైక్‌ ప్రొటీన్‌ ఆధారిత టీకాలు కేవలం ఆ మేరకే పనిచేస్తాయి. ఇంతకుముందు వచ్చిన బీటా వేరియంట్‌, డెల్టా వేరియంట్‌లకు  వ్యతిరేకంగా ఇవి పనిచేశాయి. తీవ్రమైన జబ్బు నుంచి రక్షించాయి. కానీ.. వాటి సామర్థ్యం కొంచెం తగ్గిపోయిందని ఆయా టీకా ఉత్పత్తి సంస్థలే ఒప్పుకున్నాయి. కానీ పూర్తి నిర్జీవ వైరస్‌ను వాడే కొవాగ్జిన్‌ తరహా టీకాలతో ఆ పూర్తి వైరస్‌ మన శరీరానికి పరిచయం అవుతుంది. అంటే సహజమైన ఇన్‌ఫెక్షన్‌ మాదిరిగా అన్నమాట. ఆ పూర్తి వైరస్‌ పరిచయం అయినప్పుడు అందులో చాలా యాంటీజెన్లు ఉంటాయి. వాటికి ప్రతిగా యాంటీబాడీలు కూడా తయారవుతాయి. తద్వారా విస్తారమైన రోగ నిరోధక శక్తి లభిస్తుంది. అయితే ఇందులో పెద్ద ఎత్తున స్పైక్‌ ప్రొటీన్‌ ఆధారిత రోగ నిరోధక శక్తి తయారుకాకపోవచ్చు. కానీ ఇతర యాంటీబాడీలు తయారై ఉండడం వల్ల.. ఒకవేళ ఉత్పరివర్తనం కారణంగా స్పైక్‌ ప్రొటీన్‌ యాంటీబాడీలు పనిచేయని సందర్భం ఎదురైనప్పుడు.. మిగిలిన యాంటీబాడీలు పనిచేసే అవకాశం ఉంటుంది. ఆ విధంగా చూస్తే మిగిలిన వ్యాక్సిన్ల కంటే కొవాగ్జిన్‌ తరహా వ్యాక్సిన్‌లు బాగా పనిచేస్తాయని భావించవచ్చు. అయితే ఇది ఒక అంచనా మాత్రమే. పూర్తిగా ప్రయోగశాలలో నిర్ధారణ కావాల్సి ఉంది. దీనిపై నేషనల్‌ ఇన్‌స్టిట్యూట్‌ ఆఫ్‌ వైరాలజీ వారు ప్రయోగాలు చేస్తున్నారు. డెల్టా వేరియంట్‌ వచ్చినప్పుడు కూడా ఇనాక్టివేటెడ్‌ వ్యాక్సిన్‌ సమర్థంగా పనిచేస్తుందని స్పష్టంచేశారు. ఇప్పుడు ఒమిక్రాన్‌పైనా పరిశోధనలు జరుగుతున్నాయి. వారం రోజుల్లో ఈ విషయంపైనా వారు స్పష్టత ఇస్తారు.

బూస్టర్‌ డోసుపైనా చర్చ జరుగుతోంది?

ప్రస్తుత పరిస్థితుల్లో బూస్టర్‌ డోసు ఇవ్వాల్సి వస్తుంది. ఎందుకంటే ఒమిక్రాన్‌ కాకపోయినా.. ఇప్పటికే డెల్టా వేరియంట్‌ మన దగ్గర ప్రభావం చూపుతోంది. అయితే వెనువెంటనే తొందరపడి అందరికీ ఇవ్వాల్సిన అవసరం లేదు. 60 ఏళ్లు పైబడిన వృద్ధులు, అధిక రక్తపోటు, మధుమేహం, గుండె, మూత్రపిండాలు, కాలేయ జబ్బులు, క్యాన్సర్‌ వంటి దీర్ఘకాలిక జబ్బులతో బాధపడుతున్నవారికి, రోగ నిరోధక శక్తి తక్కువగా ఉన్నవారికి ప్రాధాన్య క్రమంలో ఇవ్వాలి. కొవిడ్‌ రోగులతో నిత్యం గడిపే వైద్యులు, నర్సులు, ఇతర ఆసుపత్రి సిబ్బంది లాంటి వారికి కూడా ఇవ్వాలి. వచ్చే పరిస్థితులను బట్టి, టీకాల లభ్యతను కూడా పరిగణనలోకి తీసుకోవాలి. ఒకవేళ కేసులు పెరుగుతూ పోతే.. బూస్టర్‌ డోసు ఇవ్వడంపై ప్రభుత్వం త్వరలోనే నిర్ణయం తీసుకుంటుందని భావిస్తున్నాను.