Published : 09/12/2021 05:15 IST

డ్రంకెన్‌ డ్రైవ్‌ కేసులు 1.1 శాతమేనట!

దర్యాప్తులో లోపిస్తున్న శాస్త్రీయత
సైబరాబాద్‌ ఆర్‌టీఏఎం విభాగం విశ్లేషణలో 35 శాతంగా వెల్లడి
డ్రైవర్‌ దొరక్కపోతే ‘అతి వేగం’ కింద నమోదు!
న్యాయస్థానాల్లో వీగిపోయేందుకు ఆస్కారం

తెలంగాణలో 2019లో 21,570 రోడ్డు ప్రమాదాలు జరిగాయి. వాటిలో మద్యం మత్తులో జరిగినవి కేవలం 246 మాత్రమేనని పోలీస్‌శాఖ చెబుతున్న లెక్క. అంటే మొత్తం ప్రమాదాల్లో కేవలం 1.1 శాతం. అతి వేగం కారణంగా 20,669 (95.8 శాతం) ప్రమాదాలు సంభవించాయని నమోదు చేశారు. రోడ్డు ప్రమాదాల దర్యాప్తులో శాస్త్రీయ  ఆధారాలు సేకరించలేకపోవడం వల్లే అధిక  శాతం ప్రమాదాలను ‘అతి వేగం’ ఖాతాలో     వేసేస్తున్నారనే ఆరోపణలు వెల్లువెత్తుతున్నాయి.
ఈనాడు, హైదరాబాద్‌: రాష్ట్రంలో ఏటా సుమారు 20 వేల రోడ్డు ప్రమాదాలు జరుగుతుండగా.. దాదాపు 6 వేల మంది ప్రాణాలు కోల్పోతున్నారు. మద్యం మత్తులో వాహనాలను నడపడమే 20-30 శాతం ప్రమాదాలకు కారణమని అనుమానాలున్నా.. దర్యాప్తులో ఆ విషయం తేలడం లేదు. రాజధాని పరిధిలో 24 గంటల వ్యవధిలో జరిగిన నాలుగు ఘటనలకు డ్రంకెన్‌ డ్రైవింగ్‌ కారణం కావడం గమనార్హం. డ్రైవర్‌ మద్యం తాగినట్లు నిర్ధారించేందుకు.. తాగిన మోతాదును బట్టి 24 గంటల్లోపు బ్లడ్‌ ఆల్కహాల్‌(బీఏసీ) పరీక్ష చేయాల్సి ఉంటుంది. రక్తంలో ఆల్కహాల్‌ మోతాదు 30ఎంజీ/100ఎంఎల్‌ కన్నా ఎక్కువగా ఉన్నట్లు తేలితే.. కేసు నమోదు చేయాలి. అయితే, డ్రైవర్లు ఘటన స్థలంలో దొరక్కపోతే.. డ్రంకెన్‌ డ్రైవ్‌గా పోలీసులు నిర్ధారించలేకపోతున్నట్లు కనిపిస్తోంది. సైబరాబాద్‌ పోలీసులు చేస్తున్నట్లు.. కొంతమేర శాస్త్రీయతను జోడిస్తే ఆధారాలు సేకరించే అవకాశాలున్నాయి.

సైబరాబాద్‌లో ‘ఆర్‌టీఏఎం’ విశ్లేషణ
సైబరాబాద్‌ పోలీస్‌ కమిషనరేట్‌ పరిధిలో ఈ ఏడాది తొలి ఆరు నెలల్లో జరిగిన రోడ్డు ప్రమాదాలపై ‘రోడ్‌ ట్రాఫిక్‌ యాక్సిడెంట్‌ మానిటరింగ్‌(ఆర్‌టీఏఎం)’ విభాగం చేసిన శాస్త్రీయ విశ్లేషణలో దాదాపు 35 శాతం ప్రమాదాలకు డ్రంకెన్‌ డ్రైవింగే కారణమని తేలింది. ‘ప్రమాదానికి కారణమైన వాహనం డ్రైవర్‌ ఘటనాస్థలిలో దొరక్కపోతే అతడు ప్రయాణించిన మార్గంలో దారిపొడవునా సీసీ కెమెరాలను విశ్లేషిస్తున్నాం. ప్రయాణం మధ్యలో మద్యం కొన్నట్లు గాని, తాగినట్లు గాని కనబడితే.. స్థానిక పోలీసులకు సమాచారం చేరవేస్తున్నాం. కేసులో 304(బీ) సెక్షన్‌ జోడించి అభియోగపత్రం దాఖలు చేసేలా చూస్తున్నాం. ఫలితంగా డ్రంకెన్‌ డ్రైవింగ్‌ కేసులను నిరూపించేందుకు ఆస్కారం ఏర్పడుతోంది’ అని ట్రాఫిక్‌ డీసీపీ ఎస్‌.ఎం.విజయ్‌కుమార్‌ పేర్కొన్నారు.

అసలుకే ఎసరు తెస్తున్న ‘అతివేగం’
ఏదైనా ప్రమాదం చోటుచేసుకున్నప్పుడు అందుకు కారణమైన వాహనం డ్రైవర్‌ ఘటనాస్థలిలో దొరక్కపోతే.. అతివేగం వల్ల ఆ ఘటన జరిగిందని పోలీసులు కేసు నమోదు చేస్తున్నారు. చాలా రహదారుల్లో వేగపరిమితి అంతకన్నా ఎక్కువగా ఉండటం వల్ల న్యాయస్థానాల్లో కేసులు వీగిపోయేందుకు ఆస్కారమేర్పడుతోందనే అభిప్రాయాలు వ్యక్తమవుతున్నాయి.
*ఉదాహరణకు హైదరాబాద్‌-బెంగళూరు జాతీయ రహదారిలో ఓ లారీ 75 కి.మీ.ల వేగంతో వెళ్లి ఆటోను ఢీకొట్టడంతో.. అందులోని ప్రయాణికులు ఎవరైనా మరణించారనుకుందాం. లారీని అతి వేగంగా, నిర్లక్ష్యంగా నడపడం వల్లే ప్రాణనష్టం జరిగిందని పోలీసులు 304(ఏ), 337 ఐపీసీ సెక్షన్లు నమోదు చేస్తున్నారు. వాస్తవానికి ఆ రహదారిపై గంటకు 100 కి.మీ.లను గరిష్ఠ వేగంగా నిర్ధారించారు.
* హైదరాబాద్‌ బాహ్యవలయ రహదారిపై 100 కి.మీ.లు, ఇతర రాష్ట్ర, జాతీయ రహదారులపై ప్రాంతాలను బట్టి 80-100 కి.మీ.ల గరిష్ఠ పరిమితిని నిర్ధారించారు. అంతకన్నా తక్కువ వేగంతో వెళ్తూ ప్రమాదాలకు కారణమైన వాహనాలపైనా అతి వేగం కేసులు నమోదు చేస్తున్నారని గణాంకాలను బట్టి తెలుస్తోంది. రోడ్డు ప్రమాదాల కేసుల్లో శిక్షల శాతం 30కి మించకపోవడానికి దర్యాప్తు తీరుతెన్నులే కారణమని నిపుణులు విశ్లేషిస్తున్నారు.

Read latest Top News and Telugu News

 Follow us on Facebook, Twitter, Instagram, Koo, ShareChat and Google News. Subscribe our Telegram Channel.

Advertisement

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జాతీయం

మరిన్ని